Шойгунинг қизи сурати учун танқид қилинган депутат билан Дубайда бўлгани аниқланди

Турчак Дубайда дам олгани учун танқид қилган депутат Денис Долженко, эҳтимол, у ерда Россия мудофаа вазирининг қизи билан бирга бўлган.

Фото: AP

«Единая Россия» бош кенгаши котиби Андрей Турчак Дубайда суратга тушгани учун партия гувоҳномасидан маҳрум этишга ваъда берган Вологда вилояти қонунчилик мажлиси депутати Денис Долженко, эҳтимол, Россия мудофаа вазири Сергей Шойгунинг қизи Ксения билан БААда бўлган. Бу ҳақда 10 январь, сешанба куни Долженконинг ижтимоий тармоқларидаги суратларни ўрганган SOTA нашри ёзмоқда.

6 январь куни депутат югуришга чиққан вақтида олинган суратни эълон қилиб, бу жой Дубайдаги қирғоқ эканини белгилаган. Турчак уруш пайтида Дубайда дам олишни номақбул деб ҳисоблаб, суратга муносабат билдирди.

«Қийин кунлар кучли одамларни дунёга келтиради. Бизнинг фронтдаги йигитларимиз каби. Уларга ёрдам бераётганлар каби. Улар ҳақиқат билан алоқани йўқотганларнинг ўрнига келишади. Ушбу байрам кунлари бир қанча резонансли вазиятлар содир бўлди.  «Единая Россия» депутатларидан айримлар етарли даражада ватанпарварлик кўрсатмади. Ҳаётда кўп нарсаларни қилиш мумкин – югуриш, шўнғиш, чанғида учиш. Аммо ҳамма нарсанинг ўз вақти ва жойи бор», деб ёзган Турчак Долженкони партия гувоҳномасидан маҳрум қилишга ваъда бериб. 

Депутатнинг ўзи РБК'га у партия аъзоси эмаслигини ва партия гувоҳномасига эга эмаслигини айтди.

Эртаси куни Долженко мудофаа вазири Сергей Шойгунинг қизи Ксений Шойгу билан қўшма суратни жойлаштирди. Сурат остида у «Вологда» геотегини кўрсатди. SOTA Вологдада йўқ бўлган Louis féraud бутикининг белгисига эътибор қаратди.

Нашр полдаги белгиларни Дубайдаги дўконлардаги фотосуратлар билан таққослаб, сурат The Dubai Mall'да олинганини аниқлади. Расм қачон олинганлигини эълон қилинган фотосуратдан аниқлаб бўлмайди.

Сентябрь ойида "Проект" нашри Турчакнинг оиласи 2014 йилдан бери сиёсатчининг дўстлари номига рўйхатдан ўтказилган Канндаги ҳашаматли вилладан мунтазам фойдаланаётганини аниқлади. Унинг рафиқаси Франция жанубига тез-тез ташриф буюради. "Проект"нинг ҳаво саёҳатлари маълумотлар базасига таяниб маълум қилишича, у 2014 йилдан бери Каннга 20 мартадан кўпроқ парвоз қилган, охирги парвоз 2022 йил февралида бўлган.