АҚШ икки тадбиркорни Векселбергнинг яхтасини яширганликда айблади

АҚШ ҳукумати икки тадбиркорни санкциялар рўйхатига киритилган россиялик олигарх Виктор Векселбергга тегишли Tango яхтасини санкциялардан олиб чиқишга уринишда айблади. Россия ва Швейцариянинг икки фуқаролигига эга 51 ёшли Владислав Осипов ҳамда 52 ёшли британиялик Ричард Мастерс АҚШни алдаш, санкциялар режимини бузиш ва пул ювишда айбланмоқда. Бу ҳақда Америка Адлия вазирлиги 20 январь, жума куни хабар берди.

Айблов хулосасига кўра, 2018 йилда Оқ уй томонидан Векселбергга нисбатан жорий қилинган санкцияларга қарамай, Осипов ва Мастерс Америка компаниялари ва АҚШ молия тизимидан фойдаланиб, Векселберг яхтасига эгалик ҳуқуқини яширишга ва унинг ишлашини таъминлашга ҳаракат қилишган. Айтилишича, хусусан, Мастерс яхта учун сохта ном – Fanta'ни ишлатиш схемасини ишлаб чиққан. «Ушбу ниқоб натижасида Америка молия институтлари Tango фойдасига юз минглаб долларлик операцияларни амалга оширди, агар улар Векселбергнинг молиявий операцияларга алоқадорлиги ҳақида билганида, бунга йўл қўймаган бўларди», — дейилади Адлия вазирлиги баёнотида.

Мастерс ўша куни Испанияда Қўшма Штатлар талабига биноан қўлга олинди, у экстрадиция қилиниши кутилмоқда. Осиповни ҳибсга олиш учун ордер берилган.

Миллиардер Виктор Векселберг Россия президенти Владимир Путинга яқин шахс саналади. Тадбиркор металлургия, тоғ-кон саноати, технология ва бошқа активларни ўз ичига олган Москвадаги Renova Group конгломератига раҳбарлик қилади. У 2018 йилнинг апрелида Россиянинг АҚШ сайловларига аралашувига алоқадорликда гумон қилиниб, АҚШ санкциялари рўйхатига киритилган эди. Унинг мамлакатдаги барча активлари музлатилган, Америка компанияларига у билан битимлар тузиш тақиқланган.

Россиянинг Украинадаги агрессияси фонида АҚШ ва унинг халқаро ҳамкорлари Кремль тарафдорларига нисбатан жазо чораларини кучайтирди. 2022 йил апрель ойида Испания ҳукумати АҚШ талабига биноан Векселбергнинг 78 метрлик, 90 миллион долларга баҳоланган Tango яхтасини Майоркада хатловга олди.