Исроилнинг собиқ бош вазири Путин унга Зеленскийни ўлдирмасликка ваъда берганини эслади

Исроилнинг собиқ бош вазири Нафтали Беннет урушнинг илк кунларида Владимир Путин унга Украина президенти Володимир Зеленскийни ўлдирмасликни ваъда қилгани ҳақида эслаган. Бу ҳақда The Jerusalem Post нашри хабар берди.

Исроилдаги 12-каналга берган интервюсида мамлакат ҳукуматини 2021-2022 йилларда бошқарган Беннет 2022 йил баҳорида Москвага ташриф буюрганида РФ президенти билан ушбу масалани ҳам муҳокама қилганини айтиб берган. Собиқ бош вазирнинг сўзларига кўра, у Россия президентига Украина президентининг ҳаёти ҳақида тўғридан тўғри савол берган, Путин эса шундай жавоб қайтарган: «Мен Зеленскийни ўлдирмоқчи эмасман». Ўшанда Беннет Россия президентидан бунга сўз беришни сўраган ва Путин бундай қилмоқчи эмаслигини такрорлаган.

Учрашувдан кейин Беннет бу вақтда махфий бункерда бўлган Зеленскийга Путиннинг ваъдасини етказиш учун қўнғироқ қилган ва унинг ҳаётига хавф йўқлигини хабар қилган:

«Мени эшит, ҳозир йиғилишдан чиқдим, у сени ўлдирмоқчи эмас». У сўради: «Ишончинг комилми?» Мен айтдим: «100 фоиз, у сени ўлдирмайди».

Беннетнинг эслашича, шундан бир неча соат ўтиб Украина президенти ўз офисидан видео эълон қилган.

Исроилнинг собиқ бош вазири унинг барча ҳаракатлари АҚШ, Германия ва Франция билан келишилганини қўшимча қилган.

Беннетнинг таъкидлашича, унинг воситачилигида Путин Украина армиясини қуролсизлантиришга эришиш мақсадидан қайтган, Зеленский эса НАТОга аъзо бўлиб кирмасликка ваъда берган.

Беннет олдин ҳам кенг кўламли босқиннинг илк ҳафталарида Украина ва Россияни яраштиришга қандай урингани ҳақида айтиб берганди. Унинг сўзларига кўра, босқиндан бир неча кун ўтиб Путин унга «украинлар менга айтишганидан анча бардошлироқ бўлиб чиқди» деган. Аммо у Нафтали Беннетни шундай огоҳлантирган «Биз катта мамлакатмиз ва бизнинг сабримиз етарли». 

Беннет шунингдек 2021 йил октябрида, унинг Путин билан илк учрашуви вақтида Россия президенти Володимир Зеленский ҳақида ўшқириб шундай деганини эслаган: «У қанақасига яҳудий бўлсин? У нацизмга шерик».

• 2022 йил мартида Британиянинг The Times газетаси бир ҳафта ичида Володимир Зеленскийнинг ҳаётига уч марта суиқасд уюштирилгани ҳақида хабар қилганди. Нашр маълумотларига кўра, мамлакатга Украина президентини ўлдириш топшириғи билан икки гуруҳ келган — «Вагнер» ХҲК ёлланмалари ва чеченларнинг махсус топшириқли бўлинмаси — аммо уларнинг режасига Россия Федерал хавфсизлик хизматининг урушга қарши чиққан ходимлари халақит қилган. 2023 йил январида Россиянинг Украинага босқини бошланганидан буён Зеленский камида 12 марта суиқасдни бошдан кечиргани, шунинг бир қисмининг олдини олишда Марказий разведка бошқармаси ёрдам кўрсатгани хабар қилинди.