Байденнинг мурожаати: Америка Путин синовига бардош берди, Украинани қўллаш давом этади

Украинадаги уруш мавзуси Байденнинг бир ярим соатга яқин давом этган нутқида катта жой эгалламади, у бу мавзуга чиқиши охирида тўхталди.

У асосий эътиборни ўз маъмурияти ютуқларига, жумладан иқтисодий ҳолат, сўнгги 50 йилликдаги энг паст ишсизлик даражаси (АҚШда унинг президентлиги даврида икки йил ичида, коронавирус пандемияси фонида «рекорд даражада 12 миллион ишчи ўринлари яратилган»), шунингдек Америка жамиятининг полициядаги ирқчилик ва ўқотар қуролларнинг руҳий ҳолати беқарор бўлган одамлар қўлига тушиши каби ўзига хос муаммоларига қаратди.

Бу президент Байденнинг учинчи мурожаатномаси бўлди – ноябр ойидаги оралиқ сайловлардан кейинги биринчиси, ўшанда Вакиллар палатасида республикачилар кўпроқ ўринни эгаллашганди.

Шу билан биргаликда, республикачиларнинг сон жиҳатдан устунлиги сайловлардан олдин кутилганидан камроқ бўлди, қолаверса улар Сенатда устунликни қўлга кирита олмади. Ноябр ойида 80 ёшни қаршилаган президентнинг нутқи эса ишончли ва жанговар кўринди.

Байден ўзининг олдинги мурожаати Россиянинг Украинага кенг кўламли босқинининг дастлабки кунларида бўлганини эслади - «Иккинчи жаҳон уруши даврида Европа бошдан кечирган ўлим ва вайронгарчилик картинаси хотираларини уйғотадиган қонли ҳужум».

«Путиннинг босқини асрга татигулик синов бўлди. Америка учун синов. Бутун дунё учун синов. Биз энг асосий тамойилларга амал қиламизми? Биз суверенитетни ҳимоя қила оламизми? Биз халқнинг зулмдан эркин бўлиш ҳуқуқини ҳимоя қиламизми? Биз демократияни ҳимоя қилиш учун туриб бера оламизми? Зеро бундай ҳимоя биз учун муҳим, у тинчлик ва осойишталикни сақлайди, хавфсизлигимиз ва фаровонлигимизга таҳдид солувчи барча эҳтимолий тажовузкорлар учун ов мавсумини тўхтатади», дея давом этган америкаликлар президенти.

«Бир йил ўтиб биз бу саволларнинг жавобини биляпмиз. Ҳа, ҳимоя қиламиз. Биз аллақачон ҳимоя қиляпмиз. Биз биргаликда Америка энг яхши даврларида қилган ишни қилдик. Биз етакчиликни қўлга олдик. Биз НАТОни бирлаштирдик. Биз глобал коалиция туздик. Биз Путиннинг тажовузига қарши турдик. Ва биз Украина халқи билан елкама-елка турдик», - деган Байден.

У залда ўтирган Украинанинг АҚШдаги элчиси Оксана Маркаровага юзланган ва йиғилганлардан уни олқишлашни сўраган.

«У нафақат ўз халқини, балки ўз халқи жасоратини ифодалайди. Эй элчи, Америка сизнинг мамлакатингизни қўллаб-қувватлашда ҳамжиҳат. Биз қанча керак бўлса шунча вақт сиз билан бирга бўламиз», деди Байден.

Ўз чиқиши давомида Байден бирор марта Россия сўзини тилга олмаган, шу билан бирга «Путин уруши», «Путиннинг босқини» ва «Путиннинг тажовузи» ибораларини қўллаган. Байден Россия президенти фамилиясини тўрт бор ишлатган. Россиянинг РИА Новости агентлиги эътибор қаратишича, Байден ўтган йилги чиқишида Путинни 30 бор тилга олиб ўтганди.