75 та ўтов, мингта контейнер ва ҳарбий чодирлар – қардош халқлар Туркияга ёрдам беришда давом этмоқда

Туркий давлатлар қардош Туркиянинг зилзиладан жабрланган ҳудудларига инсонпарварлик ёрдами юбориш билангина чекланиб қолмаяпти. Хусусан, Қаҳрамонмарашда қирғизистонликлар 70 дан ортиқ чодир ўрнатмоқда. Озарлар Адияманда 1000 та контейнер шаҳарча қуришга киришган бўлса, ўзбеклар Хатай вилоятида ҳарбий чодирлар ўрнатиб, жароҳатланганларга биринчи ёрдам кўрсатмоқда.

Фото: Facebook/Kgdernek

Туркиянинг зилзиладан жабрланган Қаҳрамонмараш шаҳрида Қирғизистондан махсус самолётда олиб келинган 75 та ўтов – чодир-уйлар жойлаштирилди.

Жабрланганларни вақтинча сақлаш учун мўлжалланган чодирларни ўрнатишда Туркиядаги қирғиз диаспораси ва талабалар фаол ёрдамлашмоқда.

Озарбойжон эса Туркия жануби-шарқидаги Адияман шаҳрида 1000 контейнер шаҳарча қуради.

Озарбойжон ва Туркия ишбилармонлар ва саноатчилар уюшмаси раҳбари Ҳусайн Буюкфиратга кўра, контейнер шаҳарчаларини ўрнатиш режаси устида ҳозирданоқ иш олиб борилмоқда. Биринчи босқичда Адияманда 1000 контейнер шаҳарча қурилади.

Айни вақтда зилзиладан жабрланган Хатай вилояти Овакент маҳалласида Ўзбекистон Мудофаа вазирлиги томонидан ҳарбий чодирлар ўрнатилган. Бу ерда 70 дан ортиқ ҳарбий шифокор жабрланганларга тиббий ёрдам кўрсатмоқда.

Бундан ташқари, барча туркий давлатлар табиий офатдан сўнг зилзила бўлган ҳудудларга ўз қутқарувчиларини юборди. Шунингдек, гуманитар ёрдамлар тинмаяпти.

Эслатиб ўтамиз, 6 февраль куни Туркиянинг жануби-шарқида 2 маротаба магнитудаси етти баллдан ортиқ бўлган кучли зилзилалар содир бўлди. Бугунга келиб, даҳшатли зилзила қурбонлари сони 31,6 минг кишидан ошган, жароҳатланганлар эса 100 минг кишидан ошиб кетди.

#Туркия #зилзила #инсонпарварлик ёрдами