Шольц Путин билан Украина бўйича музокаралар ҳақидаги талабни рад этди

Германия канцлери Олаф Шольц Украинада тинчлик ўрнатиш учун Россия президенти Владимир Путин билан музокаралар ўтказиш талабларини кескин рад этди. «Томоққа пичоқ тиралганда, ҳеч қандай музокара бўлмайди – қулликдан бошқа», — деди у 2 март, пайшанба куни Германия Бундестагида Россиянинг Украинага қуролли босқини бир йиллигига бағишланган ҳукумат баёнотида.

«Украинанинг ўзини четга сурган ҳолда тинчлик ўрнатиб бўлмайди. Россия ишғоли остидаги украиналикларни қандай тақдир кутаётганини биламиз. Тинчликка интилиш каттароқ қўшнига қул бўлишни англатмайди. Агар Украина ҳимояланишни тўхтатса, тинчлик бўлмайди, бу - Украинанинг охири», - деб таъкидлади Шольц. 

«Тинчликка интилиш тажовузга аниқ қаршилик кўрсатиш демакдир. Айнан шу ишни 40 миллиондан ортиқ украиналиклар бир йилдан кўпроқ вақтдан бери қилмоқда. Биз ҳам шундай қиляпмиз, Украинага керак бўлгунича ёрдам берамиз», - дейди Германия ҳукумати раҳбари. 

Олаф Шольц Германиядаги қатор йирик митингларда янграган Киевга қурол етказиб беришни тўхтатиш талабларини танқид қилди. «Агар Берлинда «Урушга йўқ!» деб бақирсангиз ва шу билан бирга, Украинага ҳарбий ёрдамни тўхтатишга чақирсангиз, тинчликка эришиб бўлмайди», деди канцлер Россия ишғоли остида Краматорск, Изюм ва Мариуполда содир бўлган воқеаларни эслаб.

«Жабрланувчининг иродасига қарши тинчлик қабул қилиниши мумкин эмас. Бу нафақат маънавий сабабларга кўра, балки ўз мамлакатимиз фаровонлиги, Европа ва бутун дунё хавфсизлиги ҳақида қайғурганимиз учун ҳам қабул қилиниши мумкин эмас», - деб тушунтириб берди Шольц. 

Олаф Шольц, шунингдек, Хитойни Украинага қарши урушда Россияга қурол етказиб беришдан бош тортишга чақирди. «Агрессор Россияга қурол етказиб берманг, ўз таъсирингиздан фойдаланиб, Россияни қўшинларини олиб чиқиб кетишга мажбур қилинг», - деди у.