Эрон ва Саудия Арабистони дипломатик муносабатларни тиклаяпти

Эрон ва Саудия Арабистони етти йиллик танаффусдан кейин дипломатик муносабатларни тикламоқда. Икки давлат ташқи ишлар вазирлари 6 апрель, пайшанба куни Пекинда бўлиб ўтган учрашувда тегишли келишувни имзоладилар.

Элчихоналар ва консулликлар икки ой ичида қайта очилиши керак. Эрон ташқи ишлар вазири Ҳусайн Амир Абдуллоҳиён Twitter'да саудиялик ҳамкасби Файсал бин Фархон Ол Сауд билан учрашуви «ижобий» бўлганини айтди. Музокараларда «барқарорлик, хавфсизлик ва минтақавий ривожланиш» масалалари муҳокама қилинди, дея қўшимча қилди Эрон вазири. Бу икки давлат вакилларининг 2016 йилдан буён бундай даражадаги биринчи тўғридан тўғри учрашуви бўлди, деб хабар беради Reuters.

Яқинлашув Хитой воситачилигида амалга оширилди. Март ойи бошида томонлар дипломатик муносабатларни тиклашга тайёр эканликларини маълум қилган эди. Муросага эришиш йўлидаги биринчи қадам сифатида ташқи ишлар вазирларининг учрашуви режалаштирилган, дея хабар берганди IRNA ва SPA давлат агентликлари.

2015 йилнинг март ойида Саудия Арабистони бошчилигидаги коалиция Яманда исёнчи ҳусийларга қарши ҳарбий операция бошлаганида Ар-Риёд ва Теҳрон муносабатлари боши берк кўчага кириб қолган эди. 2016 йил январида Саудия Арабистони Теҳрондаги элчихонаси намойишчилар тўдаси томонидан ҳужумга учрагач, Эрон билан дипломатик алоқаларини узган.

11 март куни Европа Иттифоқи Теҳрон ва Ар-Риёд ўртасидаги муносабатлар яхшиланишини олқишлади. Бу ҳақда ЕИ вакили баёнотида айтилган. «Саудия Арабистони ҳам, Эрон ҳам минтақа хавфсизлигини таъминлашда марказий рол ўйнайди, уларнинг икки томонлама муносабатлари тикланиши бутун минтақани барқарорлаштиришга ёрдам бериши мумкин», дейилади ҳужжатда. Унда «тинчлик ва барқарорликка кўмаклашиш ҳамда бутун Яқин Шарқда кескинликни юмшатишга эришиш Европа Иттифоқининг асосий устувор йўналишлари эканлиги» қайд этилган.