ЕТТБ Masdar Ўзбекистонда учта фотоэлектр станциясини қуриши учун 205 млн доллар ажратади

Европа тикланиш ва тараққиёт банки Абу Дабининг Masdar компаниясига Ўзбекистонда 900 МВт бўлган учта янги қуёш электр станциясини қуриш учун 205 миллион доллар миқдоридаги кредит пакети ажратди. Бу ҳақда Gazeta.uz ЕТТБга таянган ҳолда хабар қилди.

Фото: Kun.uz

Лойиҳалар Осиё тараққиёт банки, Осиё инфратузилма инвестиция банки ва Европа инвестиция банки каби молиявий институтлар билан бирга молиялаштирилиши кўзда тутилмоқда.

Masdar Жиззах вилоятида номинал қуввати 220 МВт бўлган Nur Jizzakh, Самарқанд вилоятида номинал қуввати 220 МВт бўлган Nur Samarkand ва Сурхондарё вилоятида номинал қуввати 457 МВт бўлган Nur Sherabad фотоэлектр қуёш электр станцияларини қуриш ва фойдаланишга топширишда ёрдам беради.

Электр станциялари ишга туширилгандан сўнг, учта лойиҳа биргаликда 2200 ГВт/соатгача электр энергияси ишлаб чиқариши кутилмоқда. Бу Ўзбекистонда 1 миллиондан ортиқ хонадонни электр энергияси билан таъминлайди.