ISW: Путин Украина қарши ҳужуми олдидан кейинчалик айб юкланадиган шахсларни қидирмоқда

Урушни ўрганиш бўйича Америка институти (ISW) экспертлари фикрича, Россия президенти Владимир Путиннинг Кремл томонидан ташкиллаштирилган Луҳанск ва Херсон вилоятларидаги икки рус ҳарбий гуруҳи штабига ташрифи бир нечта мақсадларни кўзлаган.

19 апрель, чоршанба куни эълон қилинган уруш ҳақидаги сўнгги шарҳда ISW таҳлилчилари Путин Украинанинг режалаштирилган қарши ҳужумини кутган ҳолда ўзини «уруш давридаги етакчи» сифатида кўрсатишда давом этяпти, деган фикрда.

Кремл матбуот котиби Дмитрий Песковнинг таъкидлашича, ташриф Пасхадан кейинги кун, 17 апрель куни бўлиб ўтган. Шу билан бирга, эълон қилинган видеолардан бирида Путиннинг Пасха яқинлашаётганини айтгани эшитилади, бу сафар эртароқ санада амалга оширилган бўлиши мумкинлигини кўрсатади, дейилади ISW ҳисоботида. 
 
Институт экспертлари Кремл Путин ташрифи ҳақидаги маълумотни янгиликлар майдонида Украина президенти Володимир Зеленскийнинг фронт чизиғида жойлашган Авдийивкага сафари ҳақидаги хабарларга соя солиш учун атайлаб эълон қилган бўлиши мумкинлигини истисно қилмаяпти. 

ISW россиялик ҳарбий блогерларнинг Россия президенти Украинаникидан фарқли равишда жанговар ҳудудларда кўринмайди, деган танқидига эътибор қаратган. Шу билан бирга, геолокацион кадрлар Путиннинг Херсон вилояти жануби-ғарбий қисмида, фронт чизиғидан камида 130 км узоқликда жойлашган Арбат Стрелкага ташриф буюрганини кўрсатади, дейилади шарҳда. 

«Путин ташрифи, эҳтимол, Украинанинг режалаштирилган қарши ҳужуми олдидан потенциал айбдор шахсларни ҳам омма олдида аниқлашга қаратилган», - дейди ISW’даги таҳлилчилар. Уларнинг таъкидлашича, ҳаво-десант кучлари қўмондони Михаил Теплинский, «Днепр» қўшинлари гуруҳи қўмондони Олег Макаревич, шунингдек, генерал-полковник Александр Лапин ва Херсон ҳамда Луҳанск вилоятидаги номлари ошкор этилмаган бошқа ҳарбий раҳбарлар Россия президентига ҳисобот берган.

«Эҳтимол, Путин атайлаб Теплинский ва Макаревични Украина жанубига, Лапинни эса Луҳанск йўналишига масъул қўмондон сифатида ажратиб кўрсатган бўлиши мумкин», деб ёзади ISW.