Песковнинг ўғли «Вагнер» сафида Украинада ярим йил жанг қилганини айтди. Журналистлар ишонмади

«Вагнер» хусусий ҳарбий компанияси асосчиси Евгений Пригожиннинг тасдиқлашича, Россия президенти матбуот котиби Дмитрий Песковнинг ўғли Украинада жанг қилган. У бу ҳақда 21 апрел куни чиққан интервьюда айтиб ўтган. Пригожиннинг сўзларига кўра, Дмитрий Песков ўз ўғлини «Вагнер» ХҲК сафига «оддий артиллериячи» сифатида «қабул қилиш»ни сўраган, у эса бу ишни «Ураган» баравар ўт очиш реактив тизимида «мутлақо яхши уддалаган».

Пригожин аниқ шахс номини айтмаган, аммо унинг аниқлик киритишича, бу ўз вақтида АҚШ ёки Англияда яшаб келган йигитдир. Бу таъриф эса Дмитрий Песковнинг катта ўғли, 33 ёшли Николай Чоулзга мос келади, у 10 йил давомида Буюк Британияда истиқомат қилган ва 2011–2012 йилларда Россияга қайтиб келганди.

Пригожиннинг айтишича, Дмитрий Песков унга 2022 йил ёзида мурожаат қилган — у эса Кремл расмийсига ўғлини РФ мудофаа вазирлигига жўнатмаслик кераклиги, чунки бу ҳолда у «штабда ўтириши ёки тўп еми бўлиб кетиши»ни айтган. Пригожин Песковнинг ўғлини ХҲКга «сохталаштирилган ҳужжатлар орқали қабул қилгани, унинг фамилияси, исми ва шарифи ўзгартирилгани», у тайёргарлик жараёнидан ўтгани ва шартнома асосида ярим йил хизмат қилиб, таътилга кетганини айтган.

РБК нашри хабар беришича, Дмитрий Песков ўз ўғли Украинадаги урушда қатнашганини тасдиқлаган. «Ҳа, у чиндан ҳам махсус ҳарбий амалиётда иштирок этди. Бошқа тафсилотларни гапирмоқчи эмасман, бунинг менинг ишимга алоқаси йўқ», — деган Россия президенти матбуот котиби.

Николай Чоулз «Комсомольская правда»га интервью берган ва отаси унга Украинадаги «махсус ҳарбий амалиёт» бошланганида «Вагнер» билан алоқага чиқишда ёрдам қилганини айтган. «„Maxсус ҳарбий амалиёт“да қатнашишга қарор қилганимда, у ерга қандай боришни билмасдим. Шундай қилиб, отамга мурожаат қилишимга тўғри келди. Мен ундан ХҲК билан қандай қилиб тўғри боғланишим мумкинлигини сўрадим. Ва у бунда менга ёрдам кўрсатди», — деган Чоулз. Унинг сўзларига кўра, у буни ўз бурчи деб билгани учун жанг қилишга отланган, яқинлари эса бу қарорни қўллаб-қувватлаган. «Қаерга кетаётганимни тушуниб турганимга қанчалик ишончим комиллигини сўрашди. Мен жавоб қайтардим: „Ҳа“. Ва улар олға дейишди», — деган Чоулз.

Ўзининг айтишича, у «Вагнер» ХҲКга бошқа фамилия билан (айнан қандай фамилия эканига аниқлик киритмаган ва бу «ҳали яна керак бўлиб қолиши мумкинлиги»ни айтган). Песковнинг ўғли тасдиқлашича, Украинада кўрсатган «ҳарбий жасорати» «Жасорат учун» медали билан тақдирланган. «Менинг бутун экипажим жасорат кўрсатди. Бизда бир қизиқарли сафар бўлганди. Бундан ортиғини мен сизга айта олмайман», — деган у. Чоулз ХҲК ёлланма жангчиларини «ҳар жойдан бўлган дўстона коллектив» деб атаган ва урушга, қуролдошлари ёнига қайтишни хоҳлашини қўшимча қилган: «Менинг бир қисмим уларнинг олдига қайтишни истайди».

Қатор оммавий ахборот воситалари эса Песковнинг ўғли урушга борганига шубҳа қилмоқда — унинг «Тесла» русумли автомашинаси Москвада жарима олишда давом этгани туфайли. ВЧК-ОГПУ аноним телеграм-канали тасдиқлашича, 2023 йил март ойи охирига қадар Николай Чоулзга тегишли бўлган Tesla Model X автомашинаси 2022 йилнинг 24 июлида ва 6 ноябрида қоида бузган, яъни у Украинада бўлгани айтилган даврда. Телеграм-каналда «Тесла» тезликни оширгани акс этган скриншотларни келтирган.

Sota манбаси қайд этишича, машинадан Николай Чоулздан ташқари Дмитрий Песков ҳам фойдалангани маълум. Автомобил сотиб юборилганига қарамай, Чоулз электрокар учун расмийлаштирилган иккита мажбурий суғурта полисидан бирига эгалик қилишда давом этмоқда.

«Вагнер» ХҲКнинг собиқ ва ҳозирги артиллериячилари ВЧК-ОГПУ телеграм-каналига берган изоҳида айтишича, Чоулзни «Соледар йўналишида ҳам, Бахмут йўналишида ҳам учратишмаган». Шунингдек, Песковнинг ўғлининг танишлари ВЧК-ОГПУ билан суҳбатда айтишича, у ҳеч қачон узоқ вақт ғойиб бўлиб қолмаган. Бошқа манбалар бу маълумотни тасдиқламаган.

Николай Чоулз 2023 йил январида россиялик пропагандачи Владимир Соловьевнинг видеосида рол ижро этган. Унда юзига ниқоб тутган ҳарбий ўзини «Вагнер» ХҲКнинг Чебоксардан бўлган артиллериячиси сифатида таништиради. «Мен операцияни қўллаб-қувватлаб, иштирок этишга қарор қилдим. [Яқинларим] қўллаб-қувватлади, аммо дарҳол эмас, албатта. Бироз шокка тушишди, хавотирланишди, аммо менинг қароримни ҳурмат қилиб, қўллаб-қувватлашди», — деган у. Astra нашри қайд этишича, Песковнинг ўғли билан интервюни чиқарган «Комсомольская правда» нашри материал иллюстрацияси учун Соловьевнинг видеоси скриншотидан фойдаланган.
 
Владимир Соловьев ҳам бу видеоёзувни эълон қилиб, уни «фронтдаги Николай Песков иштирокидаги эксклюзив кадрлар» деб атаган. Соловьевнинг тасдиқлашича, ёзув январ ойи охирида Соледар яқинида олинган. Пропагандачи шунингдек Соледар атрофидаги «Николай Песков ва „Ураган“ баравар ўт очиш реактив тизими» акс этгани айтилган фотосуратни ҳам тарқатган.

Пригожиннинг сўзларидан келиб чиқилса, Николай Чоулз «сохта ҳужжатлар билан» «Вагнер» ХҲКга қўшилиб жиноят содир этган бўлиши мумкин, бунга «Агентство» эътибор қаратди. «Первый отдел» ҳуқуқшуноси Евгений Смирновнинг сўзларига кўра, «Вагнер» ХҲК мавжудлигининг ўзи ҳали тартибга солинмаган, шунинг учун қандай ҳужжатлар зарур бўлиши аниқ эмас. Аммо агар Песковнинг ўғли мазкур хусусий ҳарбий компанияга аъзо бўлиш учун сохта паспортдан фойдаланган бўлса, бунинг учун бир йиллик қамоқ жазоси кўзда тутилган.

2022 йил сентябрида Россияда сафарбарлик эълон қилинганида, Песковнинг ўғли унинг урушга жўнатилиши «тўғри бўлмаслиги»ни айтганди. Ўшанда унга Алексей Навальнийнинг сафдоши Дмитрий Низовцев ўзини ҳарбий комиссар сифатида таништирган ҳолда қўнғироқ қилганди ва Чоулздан Украинага боришга тайёр ёки тайёр эмаслигини сўраганди. Песковнинг ўғли «менинг у ерда бўлишим унчалик тўғри бўлмайди» деб айтган ва ҳарбий комиссариатга боришдан бош тортганди. Шу билан бирга, у мазкур суҳбатда агар «ватанни ҳимоя қилишга тўғри келса, хавотир олманг, мен сизлар билан бўламан» деганди. «Комсомольская правда»да 22 апрел куни чиққан интервьюда Чоулз унга Навальнийнинг сафдоши қўнғироқ қилганида аллақачон хизматга тайёрланаётган бўлгани, сафар туфайли «асабийлашгани» ва шунинг учун унга «гапириб ташлагани» ҳақида айтган.