Германия собиқ канцлери Герҳард Шрёдер Россиянинг Украинага қарши уруши бошланганидан кейин уни офиси ва ходимларидан маҳрум қилган Бундестаг қарори устидан шикоят йўллади. Германияда Шрёдерни Кремлга яқинлиги учун қаттиқ танқид қилишяпти.
Берлин маъмурий суди 4 май, пайшанба куни Германия собиқ канцлери Герҳард Шрёдернинг Бундестагга даъвосини кўриб чиқишни бошлади, у бир йил аввал Шрёдерни махсус ҳуқуқ ва имтиёзларнинг бир қисми, жумладан офис ва ходимлардан маҳрум қилган. Шикоят бўйича қарор шу куни қабул қилиниши мумкин, деди суд вакили Штефан Гроскурт.
Суд мажлисида даъвогарнинг ўзи иштирок этмаяпти. Шрёдернинг адвокати Михаэл Нагел таъкидлашича, собиқ федерал канцлерни имтиёзларидан маҳрум қилиш ноқонунийдир.
Бундай жараён Германия тарихида биринчи бўлиб, фундаментал аҳамиятга эга. Штефан Гроскуртга кўра, бу билан судлар аллақачон шаклланган давлат амалиётини синовдан ўтказмоқда. Кўп йиллар давомида Германия ҳукуматларининг собиқ раҳбарлари ва собиқ федерал президентлар, ўз ваколатлари тугагандан сўнг, бир нечта ходимларга эга бўлган ўз офисларига эга бўлишган ва бутун умри давомида ундан фойдаланган.
2022 йил май ойида Германия ҳукумати социал-демократлар, «яшиллар» ва эркин демократлар коалицияси ушбу тизимни қайта ўзгартирди. Собиқ канцлерларнинг махсус хавфсизлиги энди мақом билан оқланмайди, балки улар ўзларининг аввалги лавозимлари билан боғлиқ вазифаларни, масалан, омма олдида нутқ сўзлаш ёки турли ташкилот ва ташаббусларга ҳомийлик қилиш каби вазифаларни бажаришига боғлиқ. Шрёдер энди бундай мажбуриятларни бажармайди, бу Бундестагнинг бюджет қўмитасида кўриб чиқилди ва шу асосда улар собиқ канцлерни нафақа ва хавфсизликни сақлаб қолган ҳолда офис ва ходимлардан маҳрум қилди. Август ойида Герҳард Шрёдер ушбу қарор устидан судга шикоят қилган.
Оммавий ахборот воситаларининг ҳисоб-китобларига кўра, Шрёдернинг ходимларига харажат йилига 400 минг еврони ташкил қилган. Ўтган йили унинг кабинетида беш нафар ходим ишлаган ва идора раҳбари ойига 10 минг евродан ортиқ маош олган. 2022 йил март ойида айрим ходимлар собиқ канцлернинг Россия ҳақидаги позициясига норозилик сифатида у билан ишлашдан бош тортди.
