Қашқадарёда ЙТҲ оқибатида икки киши ҳалок бўлди, яна икки киши шифохонага ётқизилди

Қарши-Шаҳрисабз автомобил йўлида Ravon-3 ва Nexia-2 машиналари ўзаро тўқнашган.

Ҳодиса 2023 йил 5 май куни соат 13:30 ларда давлат аҳамиятидаги 4Р-79 “Қарши-Чироқчи-Шаҳрисабз” автомобил йўлининг 12 километрида содир бўлган. Бу ҳақда Қашқадарё вилояти ИИБ ахборот хизмати хабар бермоқда.

Қарши тумани “Хонобод” МФЙ ҳудудида ҳайдовчи Ravon-3 машинасини Шаҳрисабз-Қарши йўналиши бўйича бошқариб келиб, қарама-қарши томондан келаётган, Nexia-2 машинаси билан тўқнашган.

Оқибатда, Nexia-2 машинасида йўловчи сифатида келаётган икки нафар фуқаро оғир тан жароҳатлари олиб, ҳодиса жойида ҳалок бўлган. Бир нафар йўловчи ва Ravon-3 ҳайдовчиси тан жароҳати олиб шифохонага ётқизилган.

Қайд этилишича, мазкур ҳолат юзасидан вилоят ИИБ ҳузуридаги тергов бўлими томонидан Жиноят кодексининг 266-моддаси 3-қисми “а” банди билан жиноят иши қўзғатилган.