АҚШ Россия ядро қуролининг Беларусга ўтказилишини кескин қоралади

Лукашенконинг Россия ядро қуролини Беларусга ўтказиш ҳақидаги сўзлари туфайли АҚШ ядровий кучлар тайёргарлигини ўзгартиришга асос кўрмаяпти.

Фото: Getty Images

Қўшма Штатлар Минск ва Москва ўртасидаги Россиянинг тактик ядро қуролларини Беларусга ўтказиш бўйича келишувни кескин қоралади. “Бу Россиянинг Украинага кенг кўламли бостириб киришидан кейин биз кўрган масъулиятсиз хатти-ҳаракатларнинг яна бир мисолидир”, деди Давлат департаменти вакили Мэттью Миллер 25 май, пайшанба куни.

Украинага қарши кимёвий, биологик ёки ядровий қуроллардан фойдаланиш “жиддий оқибатларга олиб келади”, дея огоҳлантирди у. Шу билан бирга, Вашингтон ҳали ўз ядровий кучларининг тайёрлигини қайта кўриб чиқиш учун ҳеч қандай сабаб кўрмаяпти ва Россия ядровий қуролдан фойдаланиш ниятида эканлигини кўрсатадиган бирон бир аломатни сезмаган. “Биз ўз стратегик ядро салоҳиятимизни ўзгартириш учун ҳеч қандай сабаб кўрмаяпмиз”, деди Миллер.

Бир неча соат олдин Беларус раҳбари Александр Лукашенко Москвада Россиянинг тактик ядровий қуроллари мамлакат ҳудудига ўта бошлаганини эълон қилди. "Сақлаш жойларини тайёрлаш керак эди. Биз буларнинг барчасини қилдик. Шунинг учун ядровий қуроллар ҳаракати бошланди. Бу бошланди", - деди у.

Лукашенко тактик ядро қуроллари Беларус ҳудудида аллақачон борлигини тан олиб, республикага қайтиб келганида бунга ойдинлик киритишини айтди.