Қашқадарёда маҳаллий блогер қамалди. У СЧР бўйича йиғилишни ёритмоқчи бўлгани айтилмоқда

Қашқадарёда фаолият юритувчи блогер Элмурод Одилов Яккабоғ туманида фермерлар ишига аралашганлик айби билан 15 суткага қамалди.

Олий суд ахборотига кўра, жиноят ишлари бўйича Яккабоғ туман судининг 2023 йил 27 майдаги қарорига асосан, Одилов МЖтКнинг 183-моддаси (майда безорилик) ва 198-моддаси (ҳокимият вакилининг қонуний талабларини бажармаслик ёки хизмат вазифаларини бажаришига тўсқинлик қилиш) 1-қисмида назарда тутилган ҳуқуқбузарликларни содир қилган деб топилиб, унга 15 сутка маъмурий қамоқ жазоси тайинланган.

Қашқадарё вилояти ИИБ ахборот хизматининг маълум қилишича, 26 май куни тахминан соат 22:30 атрофида Яккабоғ тумани «Ибн Сино» МФЙ ҳудудидаги пилла сақлаш омборхонасига пиллаларни қабул қилиб олиш жараёни вақтида ўзини «Elmurod blog» деб таништирган фуқаро Элмурод Одилов келган.

«Шу ерда фермерларнинг ишига аралашиб, уларга турли номуносиб савол-жавоблар қилиши оқибатида ўрталарида жанжал келиб чиққан. Ушбу жараёнда блогер фермерларни ҳақорат қилган. Пилла етиштирувчи фермерлар блогернинг хатти-ҳаракатлари юзасидан Яккабоғ туман ИИБга мурожаат қилган. Одиловга нисбатан Маъмурий жавобгарлик тўғрисидаги кодекснинг қатор моддалари билан маъмурий баённома расмийлаштирилган», дейилади вилоят ИИБ ахборотида.

Daryo нашри эса блогер аввалига пилла пунктида ИИБ ходимлари томонидан аёвсиз калтаклангани ҳақида ёзди. Нашр мухбирининг аниқлашича, калтакланган блогер Яккабоғ тумани ҳокими ўринбосари Фозил Хидировнинг ёшлар етакчиларига берган топшириқлари ижросига бағишланган йиғилишини ёритишга уринган, лекин тўсиққа учраган.

Нашр келтирган скриншотда, “Хидиров Фозил Келдиярович” исмли Telegram фойдаланувчиси барча маҳаллалардаги ёшлар етакчиларига мурожаат қилгани кўринади.

“Ҳамма ўзининг ҳудудидан биттадан счр (1 ойлик ҳарбий хизматга) фуқарони топиб, пулини тўлатиб бормаса, вазифасидан озод этишгача бўлган чоралар кўрилади. Шу топшириққа масъулият билан қаранглар. Йиғилишга – пиллага соат 20:00да етиб боринглар”, – дея ёзилган скриншотда.

Сафарбарлик чақируви резервига одам топиш мажбурияти

Ўзбекистонда ёшига етган фуқароларни сафарбарлик чақирув резервига (СЧР) жалб этишда мактаб директорлари, фермер хўжаликлари раҳбарлари ва бошқа бюджет ташкилотларини жалб этиш ҳолатлари учраб туради.

2019 йилда Ургут тумани ҳокими тумандаги барча мактаб директорларига СЧРга жалб қилиш учун бир нафардан одам топиш ва уларнинг пулларини тўлаб бериш топшириғини берганди.

Ургутдаги бу муаммо кейинги йилларда ҳам барҳам топмади: 2021 йилда туманда ишловчи шифокорлар ва педагоглар СЧРга одам топиш ва уларнинг пулларини тўлаб беришга мажбурлаётгани ҳақида мурожаат қилган. Олий Мажлис депутатлари Наврўз Ризаев ва Ғайрат Абдиев ўзларига ҳам шу тахлит мурожаат бўлганини айтишганди. Ўшанда туман ҳокимлиги ахборот хизмати бу ҳолатни рад этиб чиққанди.

Маълумот учун, СЧРга қабул қилинган фуқаролар БҲМнинг 20 баробари (айни дамда 6 600 000 сўм) тўлов қилади.

2021 йил 27 август куни Сенат ялпи мажлисида “Умумий ҳарбий мажбурият ва ҳарбий хизмат тўғрисида”ги қонун муҳокама қилинган. Муҳокама чоғида сенаторлар фуқаролар томонидан СЧРга хизмат сафига олинган шахслар тўлайдиган пул бадаллари миқдори юқори экани ҳақида турли эътирозлар бўлаётганини билдиришган.

Сенат раиси Танзила Норбоева бу бадал миқдорини ёки арзонлаштириш, ёки муқобил вариантини топиш юзасидан Мудофаа вазирлиги масъулларига икки ҳафта муддатда Вазирлар Маҳкамасига тегишли таклифларни киритиш юзасидан топшириқ берганди.

Топшириқнинг кейинги тақдири нима бўлгани номаълум, бироқ сафарбарлик чақируви резервидаги хизмат сафига олинган шахслар тўлайдиган пул БҲМнинг 20 баробари миқдорида сақланиб турибди.