Қозоғистон билан чегарани белгилашга оид шартнома ратификация қилинди

Ўзбекистон президенти имзолаган қонун билан, Қозоғистон билан давлат чегарасини демаркация қилиш тўғрисидаги шартнома ратификация қилинди. Қозоғистон томони бу битимни уч ой олдин ратификация қилганди. Шартнома билан Ўзбекистон-Қозоғистон давлат чегарасини белгилаш бўйича ишлар тўлиқ якунлангани маълум қилинди.

Президент томонидан имзоланган қонун билан Ўзбекистон ва Қозоғистон ўртасида Ўзбекистон – Қозоғистон давлат чегарасини демаркация қилиш тўғрисидаги шартнома (Тошкент, 2022 йил 22 декабрь) ратификация қилинди.

Ҳужжат Ўзбекистон президенти Шавкат Мирзиёев ва Қозоғистон президенти Қосим-Жўмарт Тўқаев томонидан унинг 2022 йил 21 декабрь куни мамлакатга давлат ташрифи чоғида имзоланган эди.

Шартномага кўра, Ўзбекистон ва Қозоғистон ўртасидаги давлат чегарасининг демаркация қилинган чизиғи узунлиги 2 356 километрдан ортиқдир.

Шартнома билан Ўзбекистон-Қозоғистон давлат чегарасини белгилаш бўйича ишлар тўлиқ якунланди ҳамда чегара хавфсизлиги ва дахлсизлигини таъминлаш учун энг муҳим шарт-шароитлар яратилди.

Бу халқаро ҳужжатни Қозоғистон томони март ойи охирида тасдиқлаган. 28 март куни президент Қосим-Жўмарт Тўқаев «Қозоғистон ва Ўзбекистон ўртасида Қозоғистон-Ўзбекистон давлат чегарасини демаркация қилиш тўғрисидаги битимни ратификация қилиш ҳақида»ги қонунни имзолаган.