“Ташаббусли бюджет”да ғолиб бўлган кўча қолиб, бошқаси таъмирланди. Аҳоли ғолиблик учун пул тўплаганди

Маълум бўлишича, Ушоқтепа маҳалласи аҳли ҳудуддаги энг оғир тўртта – Тонг юлдузи, Асқад Мухтор, Саид Аҳмад, Одил Ёқубов кўчаларини асфалт қилиш таклифи билан чиқади. Жами 3,5 километр масофани асфалт қилиш учун 1 млрд 200 млн сўм сарфланиши кўзда тутилган бўлиб, лойиҳа 13 327 та овоз билан ғолиб деб топилади.

“Таклиф маҳалладошимиз Артур Асроров номидан юборилди. Бу йигит ҳақиқатан ҳам овоз йиғиш жараёнларида фаоллик кўрсатди. Тошкентда туриб, анча овоз йиғиб берди. Сир эмас, маҳалламиздан ташқари яшовчи инсонлардан ҳам овоз йиғишга мажбур бўлдик. Бунинг эвазига овоз берувчиларга бирор хил салқин ичимлик ёки шунга ўхшаш нимадир беришга тўғри келди. Маҳалладошлар пул йиғиб, Артурга жўнатиб турдик. Бу лойиҳада ғолиб бўлишимиз учун 45-50 миллион сўм атрофида маблағ сарфланди. Бунинг учун бутун маҳалла аҳли жипслашди, кўчаларимиз асфалт бўлишига умид боғлашди.

Етарлича овоз тўплаб ғолиб бўлдик ва таклифимиз тасдиқлангани бўйича openbudget.uz сайтида эълон ҳам жойлаштирилди. Унда 1 млрд 200 млн сўм маблағ Ушоқтепа маҳалласидаги Тонг юлдузи, Асқад Мухтор, Саид Аҳмад, Одил Ёқубов кўчаларини асфалт қилиш учун сарфланиши аниқ-тиниқ қилиб ёзиб қўйилган. Маҳалла ва туман мутасаддилари иштирокида тайёрланган лойиҳа чизмасини ҳам қўлимизга олдик.

Шу кеча-кундузда маҳалламиз кўчаларини асфалтлаш жараёни бошланди. Бироқ негадир Одил Ёқубов кўчаси асфалт қилинмаслигини айтишяпти. Лойиҳа бўйича бу кўчанинг қарийб 700 метр қисми асфалтланиши керак”, – деди мурожаатчилар.

Ҳозирча аҳоли томонидан Косон тумани ҳокимлигига қилинган мурожаатлар жавобсиз қолмоқда.

Биз Косон тумани ҳокимининг соҳа бўйича ўринбосари Баҳодир Очилов билан телефон орқали боғландик.

Очиловнинг айтишича, дастлаб Ушоқтепа маҳалласининг жами 5 километр йўлини асфалт қилиш таклифи берилган. Бироқ лойиҳага ажратилган 1 млрд 200 млн сўм жами уч километр йўлни асфалт қилишгагина етган.

“Лойиҳа ташаббускорлари кўрсатган кўчаларга асфалт ётқизяпмиз. Маҳалла аҳли ҳокимиятга келишди, улар билан гаплашдик, маҳалла йўлларини яна “Ташаббусли бюджет”га қўйишадиган бўлишди. Одил Ёқубов кўчаси ҳам навбати билан асфалт қилинади”, – деди ҳоким ўринбосари Очилов.

Ушоқтепа маҳалласида яшовчилар иккинчи марта Kun.uz’га боғланиб, ҳоким ўринбосари айтганидек, маҳалла кўчаларини иккинчи марта ташаббусли бюджетга қўйиш таклифига рози эмаслигини билдирди. Уларнинг айтишича, лойиҳада асфалт қилиниши кўрсатилган Одил Ёқубов кўчаси қолиб, маҳалла марказидаги бошқа иккита – Шоҳимардон ва Мақсуд Шайхзода кўчалари асфалт қилинибди. Мурожаатчиларга кўра, бу икки кўчада яшовчи аҳолидан асфалтлаш учун пул йиғиб олинган.

“Биз лойиҳадан умид қилганмиз, ҳаловатимизни йўқотиб овоз тўплаганмиз. Ҳар бир овоз учун болаларимизнинг ризқини қийиб пул йиғганмиз”, – дейди мурожаатчилар.

Ҳақиқатан ҳам, бизга тақдим қилинган лойиҳа чизмасида Одил Ёқубов кўчасининг ҳам қарийб 700 метр қисми асфалт қилиниши режалаштирилган. Бу лойиҳа чизмаси тайёрланаётган пайтда Косон туман ҳокимининг ўринбосари, “Қашқадарё минтақавий йўлларга буюртмачи хизмати” ДУК масъул ходими ёки бевосита йўлни қуриши керак бўлган “Обод йўл қурилиш таъмир” МЧЖ мутасаддилари қанча масофа алфалт қилиниши кераклиги, унга қанча маблағ сарфланиши ҳақида наҳотки тасаввурга эга бўлмаган?

Қолаверса, ҳоким ўринбосари Очилов айтганидек пул етмай қолди, деган важ ноўрин. Чунки “Ташаббусли бюджет” лойиҳасига киритилган таклифлар овоз бериш жараёнигача маълум муддат давомида кўриб чиқилади. Содда қилиб айтганда, 10 сўмлик ишга 5 сўм ажратилмайди ёки тескариси...

Маълумот ўрнида айтиш мумкин, Ушоқтепа маҳалласидаги Шоҳимардон ва Мақсуд Шайхзода кўчалари эса дастлабки таклифда бўлмаган, лойиҳага ҳам киритилмаган.

Биз бу кўчаларнинг ҳам асфалтланишини қўллаб-қувватлаган ҳолда, овоз йиғиб ғолиб бўлганларга эришган ҳақли ютуғи тўлиқ берилиши керак, деган фикрдамиз. Ҳолат бўйича мутасаддилардан асослантирилган изоҳ ва амалий ҳаракатлар кутиб қоламиз.

Исомиддин Пўлатов,
Kun.uz мухбири.