ЕИда биринчи марта электромобиллар дизелли машиналарга қараганда кўпроқ сотилди

Европада электромобиллар сотувининг ўсиши, асосан, Германия, Нидерландия, Франция ва Бельгияда уларнинг оммабоплиги ошиши билан боғлиқ.

Фото: fleetalliance.co.uk

ACEA Европа автомобиль саноати ассоциацияси 19 июль, чоршанба куни маълум қилишича, июнь ойида Европа Иттифоқида дизел двигателли автомобиллардан (139,6 минг ёки 13,4 фоиз) кўра электромобиллар (158 минг ёки 15,1 фоиз) биринчи марта кўпроқ сотилган. Бензин моторли автомобиллар сотуви ҳамон етакчиликни сақлаб турибди, июнь ойида уларнинг улуши 36 фоиздан кўпроқни ташкил этди, иккинчи ўринда - гибрид автомобиллар (тахминан 24 фоиз). 2023 йил июнь ойида Европа Иттифоқида рўйхатга олинган янги енгил автомобилларнинг умумий сони 1,045 миллион донага етди.

Бир йил аввал, июнь ойида янги электромобилларнинг улуши 10,7 фоиз эди. Сотувнинг кескин ўсиши - 66 фоизга - уларнинг Германия, Нидерландия, Франция ва Бельгиядаги оммабоплиги билан боғлиқ. Сотилган электромобилларни ишлаб чиқарувчилар орасида Tesla улуши бошқаларга қараганда кўпроқ ўсди: 2023 йилнинг биринчи чорагида сотиб олинган ҳар бешинчи автомобиль ушбу Америка компанияси томонидан ишлаб чиқарилган.

Ўтган йилга нисбатан, июнь ойида Европада бензинли автомобиллар савдоси 11 фоизга ошган. Дизелли автомобиллар 9 фоизга камроқ сотиб олинди, аммо Германия ва Марказий Европа мамлакатларида уларнинг савдоси бироз ўсган.

2023 йилнинг биринчи олти ойида Европада жами 5,4 миллион янги автомобиль сотилган. Бу ўтган йилга нисбатан 17,9 фоизга кўп, аммо 2019 йилнинг биринчи ярмидаги коронавирус пандемиясидан олдинги кўрсаткичдан 21 фоизга кам.

Тайёрлаган: Отабек Матназаров

#ЕИ #электромобил