«Салом, йигитлар. Сизларни кўриб туришдан мамнунман. Беларус диёрига хуш келибсиз», — дейди қош қорайганда олинган видеода жуссаси ва овози Евгений Пригожинни эслатадиган одам. У «Вагнер» ёлланма жангчиларига мурожаат қилган. Бунга жавобан зулмат ичидан тушунарсиз ҳайқириқлар эшитилади. Видео чоршанба куни кечқурун мазкур хусусий ҳарбий компанияга яқин бўлган «Разгрузка Вагнера» ва «Оркестр Вагнера | Wagner» каби телеграм-каналларда тарқатилди. Бу Пригожиннинг РФ мудофаа вазирлигига қарши исёни ва Москва томон якунига етмай қолган юришидан буён илк видеоси бўлди.
Пригожин ХҲК жангчилари Беларусга ташланганини қандай изоҳлади?
«Сиз муносиб жанг қилдингиз, Россия учун жуда кўп иш қилдингиз», — дейди у видеода. Кейин эса ёлланма жангчилар нима учун Беларусга юборилганини тушунтира бошлайди: «Ҳозир фронтда содир бўлаётган воқеалар — биз унда иштирок этишимиз шарт бўлмаган шармандаликдир. Ва биз ўзимизни тўлиқ намоён қилиш мумкин бўладиган вақтни кутамиз. Шунинг учун биз бироз вақт бу ерда, Беларусда бўлишга қарор қилдик. Бу вақт ичида биз Беларус армиясини дунёдаги иккинчи армияга айлантирамиз, мен бунга аминман. Агар агар керак бўлса, уларни ҳимоя қиламиз».
У ўз нутқини якунлагач, йиғилганларга «Вагнерга ном берган командир»ни таништиради. ХҲК билан алоқадор телеграм-каналлар бу «афсонавий Дмитрий Валерьевич Уткин» эканини тасдиқлаган. Гап «Вагнер» ХҲК асосчиларидан бири ҳақида бормоқда, гуруҳга унинг лақаби берилган. Видеода Уткин ўзини «ўша Вагнер» деб атайди. Оломон уни гулдурос қарсаклар ва ҳайқириқлар билан кутиб олади.
«Амалга оширилган ишлар учун барчага катта раҳмат. Бу ишлар туфайли «Вагнер» ХҲК номи бутун дунёга танилди. Йигитлар, сизга катта раҳмат, — дейди у видеода. — Бу якун эмас, бу тез орада бошланадиган катта ишларнинг дебочаси, холос. Хўш — welcome to hell (дўзахга хуш келибсиз)».
Беларусга қанча ёлланма жангчилар келган?
Видео кун ботган маҳалда олинган – қоронғида Пригожин қаршисида саф тортган ёлланма жангчилар сонини аниқ айтиш қийин. Сешанба куни хусусий ҳарбий компания Беларусга 10 минггача жангчи йўл олгани ёки етиб боргани ҳақида маълумот берганди. Бундан икки кун олдин эса «Беларускi Гаюн» лойиҳаси мамлакатга камида икки минг жангчи етиб келганини ёзганди.
Россия қамохоналарида Украинадаги уруш учун ёлланганлар ҳозирча Беларусга бормаган бўлиши мумкин. «Важные истории» журналистлари вагнерчиларнинг қариндошлари мулоқот қиладиган чатлардаги суҳбатларни ўрганган ҳолда шундай хулосага келган.
