Буданов: «Украина тез орада Қримни озод қилиши мумкин»

Украина Мудофаа вазирлигининг Разведка бош бошқармаси («ГУР») раҳбари Кирилл Будановнинг ишонч билдиришича, Украина қўшинлари Россия томонидан аннексия қилинган Қримни тез орада озод қила олади. Бу ҳақда у ТСН телеканалига берган интервьюсида айтиб ўтди.

Фото: uanews

Шу билан бирга, у Украина томонидан яриморолнинг эҳтимолий «озод этилиши»нинг аниқ саналарини айтмади.

Айни вақтда, у Беларусда «Вагнер» жангчиларидан ҳеч қандай таҳдид йўқлигини, Россия қўшинларининг миқдорий ўсиши кузатилмаганини таъкидлади.

«Улар қанча бўлган бўлса, ҳозир ҳам шунча. Лекин сафарбарлик улар кўрган йўқотишларни доимий равишда тўлдиришга имкон беряпти», деб таъкидлади Бош разведка бошқармаси бошлиғи.

Украина Қрим ва Керч кўпригига ҳужум қилишда давом этади, дея маълум қилганди аввалроқ мамлакат мудофаа вазири Олексий Резников.

«Бу нишонларнинг барчаси қонуний, чунки бу Россиянинг бизга қарши курашиш қобилиятини пасайтиради ва украиналикларнинг ҳаётини сақлаб қолишга ёрдам беради», деди у CNN телеканалига берган интервьюсида.

Украина кўприкни бутунлай вайрон қилмоқчими, деган саволга Резников душман логистика линияларини йўқ қилишни уларни кўпроқ ўқ-дорилар, ёқилғи ва озиқ-овқат олиш имкониятидан маҳрум қилиш учун мўлжалланган «оддий тактика» деб атади.

«Шунинг учун биз уларга қарши бу тактикани қўллаймиз», - дея қўшимча қилди Украина Мудофаа вазирлиги раҳбари.

Керч бўғози орқали ўтган кўприкда навбатдаги портлашлар 17 июль куни содир бўлди. ОАВ хабарига кўра, ҳужумни Украина Хавфсизлик хизмати Украина денгиз флоти билан биргаликда уюштирган.