ЕИ суди россиялик миллиардернинг санкциялар ҳақидаги даъвосини рад этди

Евроиттифоқнинг Люксембургдаги суди 13 сентябр, чоршанба куни Магнитогорск металлургия комбинати (ММК) директорлар кенгаши раҳбари Виктор Рашниковнинг ЕИ томонидан жорий этилган санкциялардан олиб ташлашни талаб қилган даъвосини қаноатлантирмади. 

Даъво аризаси 2022 йил 24 майда берилган. Унга кўра, тадбиркор Европа Иттифоқи кенгаши уни ноқонуний ва нотўғри тарзда санкция рўйхатига қўшиб, Европа Иттифоқининг Инсон ҳуқуқлари бўйича хартиясини ва унинг самарали суд ҳимояси ҳуқуқини бузган деб ҳисоблайди. Бундан ташқари, Рашниковнинг ҳимояси мутаносиблик принципи, мулк ҳуқуқи ва тадбиркорлик эркинлиги, шунингдек, камситмаслик принципи бузилганига ишора қилди.

Европа Иттифоқининг расмий журналида таъкидланганидек, Виктор Рашников - Россиянинг етакчи олигархларидан бири, Россиядаги энг йирик солиқ тўловчиларидан бири бўлган ММК эгаси ва директорлар кенгаши раиси. «Сўнгги пайтларда компанияга солиқ юки ортиб борди, бу Россия давлат бюджетига тушумларнинг сезиларли даражада ошишига олиб келди. Шу тариқа, у муҳим даромад манбасини таъминлайдиган иқтисодиёт тармоқларида ишлайдиган етакчи россиялик ишбилармонлардан бири ҳисобланади», — дейилади ҳужжат матнида.

2023 йил бошида Венгрия расмийлари яна бир қанча бошқа олигархлар қатори Виктор Рашниковга нисбатан Европа Иттифоқи санкцияларини бекор қилишга интилаётгани маълум бўлди.

Россиялик олигархлар берган даъво аризаларининг аксарияти рад этилди

Бир ҳафта олдин, Европа Иттифоқи суди ЕИ томонидан шахсий санкциялар қўлланган бир қатор йирик россиялик тадбиркорлар ва уларнинг оила аъзолари даъволарини рад этди. Хусусан, Александр Лукашенкони қўллаб-қувватлагани учун Европа Иттифоқининг Беларусга қарши санкциялар рўйхатига киритилган тадбиркор Михаил Гуцериевнинг; НОВАТEК ва СИБУР компаниялари эгаси Геннадий Тимченко, шунингдек, унинг рафиқаси Елена Тимченконинг; «Яндекс» компанияси собиқ бошқарувчи директори Тигран Худавердяннинг; Қувур металлургия компаниясининг (ТМК) собиқ эгаси Дмитрий Пумпянский (у санкциялар рўйхатига киритилгандан сўнг ТМК бенефициарлари ва директорлар кенгашини тарк этган), унинг рафиқаси Галина Пумпянская ва ўғли Александр Пумпянскийнинг (у ҳам ТМК директорлар кенгашидан чиққан) даъволари рад этилди.

Европа Иттифоқи кенгаши Украина ҳудудий яхлитлигига путур етказувчи сиёсатни қўллаб-қувватлагани учун бу шахсларга нисбатан санкциялар қўллаганини билдирган. Улар иқтисодиётнинг Россия учун муҳим даромад манбаси бўлган тармоқларида ишлаши айтилади. Россияликлар ўзларини санкция рўйхатига ноқонуний киритилган деб ҳисоблаб, чеклов чораларини бекор қилишни талаб қилиб, судга якка тартибда мурожаат этган. 

Дмитрий Пумпянский жанговар ҳаракатларда бевосита иштирок этмаган бўлса-да, у Россия Федерацияси ҳукумати учун муҳим даромад манбаси бўлиб хизмат қиладиган иқтисодиёт тармоқларида фаолият юритади, дея тушунтирди Европа Иттифоқи суди. Ўз навбатида, Галина Пумпянская эри билан бизнес алоқаларига эга, чунки унинг компаниясига тегишли фондни бошқаради. 

Россияликлар ва беларусларнинг ўнлаб аризалари 
 
Ҳозирда Европа Иттифоқининг Люксембургдаги суди Россия ва Беларусдан бўлган жисмоний ва юридик шахсларнинг санкциялар бўйича қарорларга эътироз билдирган 80 га яқин даъволарини кўриб чиқмоқда. Ишларнинг аксарияти россиялик ишбилармонлар аризалари асосида қўзғатилган, улар активларини музлатиш ва Европа Иттифоқига киришни тақиқлаш каби чораларга дучор бўлган, аммо ҳозирча фақат «Вагнер» раҳбари Евгений Пригожиннинг онаси бу ишда ғалаба қозонишга муваффақ бўлди.