Украинадаги урушнинг 491-куни ўтди. Асосий маълумотлар:
- Рамзан Қодиров уруш баҳонасида Россия президенти сайловини вақтинча бекор қилиш ёки уни фақат бир номзод — Владимир Путин иштирокида ўтказишни таклиф этди.
- Нова Каховкада «Единая Россия» партиясининг маҳаллий бўлими котиби Владимир Малов ҳалок бўлди. Унинг автомобили портлатиб юборилган.
- Словакия Украинага ҳарбий ёрдам етказишни тўхтатди. Бу сайловларда Киевга қурол етказиб беришни тўхтатишни ваъда қилган собиқ бош вазир партиясининг ғалабасидан кейин рўй берди.
- РФ қўшини Одесса области бўйлаб «Оникс» ракеталари билан зарба йўллади. Турар жой биноси, пансионат ва ғалла омбори шикастланган. Тўрт киши жароҳат олган.
- АҚШ Россияга микрочиплар етказиб бергани учун Хитойнинг 42 компанияси билан савдо қилишни чеклади.
- Майя Санду «Пригожин жамоаси» Молдовада давлат тўнтариши уринишга тайёргарлик кўргани ҳақида айтди.
- Украинада Михаил Фридман, Петр Авен ва Андрей Косоговнинг 17 миллиард гривналик активлари хатланди.
Гроза қишлоғи қабристонида янги қабрлар
5 октябр куни Россия қўшини Харкив областида, фронт чизиғидан 35 километр масофада жойлашган Гроза қишлоғига ракета зарбаси йўллаганди. Ракета фронтда ҳалок бўлган ҳарбийнинг поминка (маърака) маросими ўтказилаётган кафега келиб урилган. Натижада 52 киши, жумладан бир бола ҳалок бўлган, олти киши жароҳат олган. Бу зарба Гроза қишлоғи аҳолисининг олтидан бир қисмини ҳаётдан олиб кетган — бу ерда жами 330 киши яшарди.
7 октябр куни Грозада қурбонларнинг дастлабкиларининг дафн маросими ўтказилди. Эр-хотин Николай ва Татяна Андросович дафн этилди. «Оккупациядан омон чиқишганди, энди эса зарбага учрашди. Ҳали жуда кўп одамни дафн этамиз», — деган «Суспільне» нашри билан суҳбатда Николай Андросовичнинг дўсти Володимир.
