Самарқандда жаҳон офталмологларнинг учинчи Халқаро конгресси иш бошлади

Самақанддаги Ипак йўли туризм марказида ташкиллаштирилган Конгрессни соғлиқни сақлаш вазири А.Иноятов табрик сўзи билан очиб берди.

Шундан сўнг ялпи йиғилиш бўлиб ўтди. Унда турли давлатдан келган олимлар чиқиш қилишда. Туркий тилли давлатлар офталмологлари жамиятининг ҳам йиғилиши назарда тутилган.

Конгрессда Республикамизнинг ёш офталмолог олимларини ўз маърузалари билан чиқиши учун алоҳида секция ташкил этилгани ҳам муҳим аҳамият касб этади. Республикамизнинг ҳам 500 дан зиёд офталмологлари қатнашмоқда.

Анжуман янада мазмунли ва тўлақонли ўтиши кўзланган бўлиб дастурда офталмологиянинг деярли барча йўналишдаги долзарб муаммолари, кенг тарқалган кўз касалликлари диагностикаси ва даволаш усуллари қамраб олинган, бу эса иштирокчиларнинг янада чуқурроқ илм олиши, тажриба алмашиши, малакасини ошириши имконини яратади.

Жумладан, «Кераторефракцион касалликларга ташхис қўйиш ва даволашнинг инновацион технологиялари», «Витреоретинал интерфейс касалликларига ташхис қўйиш ва даволашдаги янгиликлар», «Реконструктив-тикловчи жарроҳлик», «Офталмологик ёрдам кўрсатишни ташкиллаштириш», «Глаукомага ташхис қўйиш ва уни даволашдаги янги истиқболлар», «Кўз гавҳари касалликларини даволашдаги янги технологиялар» каби секцияларда олимлар фикр алмашишини кўзда тутилган.

Умуман, ўзбекистонлик офталмологларнинг халқаро алоқалари йилдан йилга мустаҳкамланиб бормоқда. Жаҳон миқёсидаги анжуманнинг Ўзбекистонда ўтказилаётгани бежиз эмас.

Бундан ташқари, шу йил Австриянинг Вена шаҳрида ўтказилган ESCRS-2023 халқаро офталмологлар Конгрессида Ўзбекистондан 40 дан зиёд, Республика ихтисослаштирилган кўз микрохирургияси илмий-амалий тиббиёт марказининг 8 нафар офталмологлар иштирок этди. Нидерландиянинг Амстердам шаҳрида ўтказилган EURETINA-2023 халқаро офталмологлар конгрессида Ўзбекистондан 5 нафар офталмолог қатнашди.

2018-2023 йилларда иарказ мутахассислариниг 50 нафари Франция, Туркия, Арманистон, Австрия, Қозоғистон, Латвия, Корея, Россия, Белоруссия каби давлатларда малака оширган. Россия Туркия, Исроил, Ҳиндистон, Хитой каби давлатлардан жами 20 нафардан зиёд ҳорижий мутахассисларнинг марказга ташрифи давомида 1000 дан ортиқ мураккаб жарроҳлик амалиётлари ўтказилган.

Ўзбекистон Республикаси ва Ҳиндистон, Россия, Германия давлатлари Соғлиқни сақлаш тизими раҳбарлари томонидан тиббиётнинг бир қанча йўналишлари, хусусан, офталмология йўналиши бўйича ўзаро шартномалар имзоланди.

Республика ихтисослаштирилган кўз микрохирургияси илмий-амалий тиббиёт маркази барча замонавий юқори технологик тиббий ускуналар билан жиҳозланган бўлиб 2018–2023 йилларда 150 та юқори технологик тиббий ускуналар билан таъминланди. Бугунги кунда марказда 45 млрд  сўмга яқин қийматга эга 230 та энг замонвий тиббий асбоб-ускуналар мавжуд.

Республикада жами 49 турдаги офталмологик касалликларни (168 нозологик бирлик) даволаш бўйича 172 турда тиббий хизматлар кўрсатилади. Марказда жарроҳлик фаоллиги 99,2 фоизни ташкил этади.

Ўтган давр мобайнида марказнинг Урганч, Термиз ва Наманган филиалларида факоэмулсификация, лазер жарроҳликлари даволаш усуллари, оптик когерент томография, ултратовушли биомикроскопия диагностика усуллари кенг жорий қилинди.

Самарқанд, Нукус, Қарши, Бухоро ва Фарғона филиалларида ҳам факоэмулсификация, лазер жарроҳликлари даволаш усуллари, оптик когерент томография диагностика усули, факоэмулсификация, витреоретинал, лазер жарроҳликлари даволаш усуллари жорий этилди.

Ҳозирда марказнинг ўзида 200 қатновга мўлжалланган катталар ва болалар поликлиникаси, 94 ўринли стационар, кунига 80–90 операция бажариш имконини берадиган 8 та автоматик жарроҳлик столи бир вақтда ишлайдиган жарроҳлик блоки мавжуд.

Шуҳрат Шокиржонов, Kun.uz мухбири