Қўшимча функционаллар
-
Тунги кўриниш
ЕК 2023 ва 2024 йиллар учун евроҳудудда ЯИМ ўсиши прогнозини пасайтирди
Евроҳудуднинг 20 та давлати иқтисодиёти, Европа комиссиясининг янги прогнозига кўра, бу йил илгари кутилгандек 0,8 фоизга эмас, 0,6 фоизга ўсади. Келгуси йилда ўсиш илгари кутилган 1,3 фоиз ўрнига 1,2 фоизни ташкил қилади.
Фото: eurasianeconomic.org
Европа комиссияси (ЕК) 2023 ва 2024 йилларда евроҳудуд иқтисодиёти ўсиш баҳосини юқори турмуш нархи, заиф ташқи талаб ва пул-кредит сиёсатининг кескинлашуви шароитида пасайтирди. Европа Иттифоқининг 15 ноябр, чоршанба куни эълон қилинган кузги прогнозида таъкидланганидек, евроҳудуднинг 20 та давлати ялпи ички маҳсулоти бу йил ёзда кутилганидек 0,8 фоизга эмас, 0,6 фоизга ўсади. 2024 йилда евроҳудуд ялпи ички маҳсулотининг ўсиши, янги ҳисоб-китобларга кўра, илгари кутилган 1,3 фоиз ўрнига 1,2 фоизни ташкил этади.
Жорий йил учун Европа Иттифоқининг 27 мамлакати учун иқтисодий ўсиш прогнози ҳам ёмонлашди - 0,8 фоиздан 0,6 фоизга, кейинги йил учун - 1,4 фоиздан 1,3 фоизга.
2025 йилда Еврокомиссия евроҳудуд иқтисодиёти 1,6 фоизга, Европа Иттифоқи 1,7 фоизга ўсишини кутмоқда.
Германия иқтисодиёти 2024 йилда ўсишни тиклайди
ЕК прогнозига кўра, Германия иқтисодиёти 2023 йилда 0,3 фоизга қисқаради ва келгуси йилда 0,8 фоизга ўсади. Илгари биринчи кўрсаткич 0,4 фоизга пасайиши, иккинчиси эса 1,1 фоизга ошиши кутилган эди. 2025 йилда Германия ялпи ички маҳсулоти 1,2 фоизга ўсиши прогноз қилинмоқда.
«Бу йил Россиянинг Украинадаги уруши, заиф глобал талаб ва юқори истеъмол нархлари таъсиридан жабр кўрган Европа Иттифоқи иқтисодиёти учун оғир йил бўлди, - деди ЕК раҳбарининг биринчи ўринбосари Валдис Домбровскис. - Бу йил жуда заиф ўсишдан сўнг, 2024 йилда мўътадил тикланишни кутиш мумкин, бунга кучли меҳнат бозори ва инфляциянинг доимий пасайиши туртки беради. Бироқ, биз Яқин Шарқдаги можаро билан янада кучайган жуда ноаниқ геосиёсий ландшафтга дуч келишда давом этамиз».
Еврокомиссия маълумотларига кўра, инфляция «пасайиш тенденциясини кўрсатишда давом этмоқда». Жорий йил учун евроҳудудда инфляция прогнози 5,6 фоиз даражасида қолдирилди ва кейинги йил учун у 2,9 фоиздан 3,2 фоизгача кўтарилди. 2025 йилда инфляция 2,2 фоизга тушиши кутилмоқда. Европа Иттифоқида, ЕК прогнозига кўра, 2023 йилда инфляция 6,5 фоиз, 2024 йилда - 3,5 фоиз, 2025 йилда - 2,4 фоиз бўлади.
Мавзуга оид
17:42 / 14.11.2024
Марказий Осиё табиий офатлар туфайли ялпи ички маҳсулотининг 6 фоизини йўқотиши хавфи бор
11:54 / 14.11.2024
«Донолар кенгаши» ГФРнинг 2024 ва 2025 йиллар учун ЯИМ прогнозини пасайтирди
22:40 / 19.10.2024
Миллион долларлик лицензия, ЕОИИга рад жавоби ва 2х ЯИМ прогнози — ҳафта дайжести
12:16 / 18.10.2024