G7 давлатлари етакчилари Эроннинг Исроилга ҳужумини қоралади

«Еттилик гуруҳи» G7 давлатлари етакчилари Эроннинг Исроилга ҳужумини «аниқ ва қатъий» қоралайди. Бу ҳақда 14 апрел, якшанба куни бўлиб ўтган йиғилиш якунлари бўйича қабул қилинган қўшма баёнотда айтилган.

«Биз Исроил ва унинг халқига тўлиқ бирдамлик ва қўллаб-қувватлашимизни билдирамиз ҳамда хавфсизлигига содиқлигимизни яна бир бор тасдиқлаймиз», — дейилади баёнотда. G7 давлатлари раҳбарлари Эронни минтақани беқарорлаштириш чораларини кўраётганликда айблади ва Теҳрон «назорат қилиб бўлмайдиган минтақавий кескинлашувни келтириб чиқариши хавфи бор» дея таъкидлаб, бунинг олдини олиш керак, деб маълум қилди.

«Еттилик гуруҳи» давлатлари вазиятни барқарорлаштириш ва кескинлашувнинг олдини олиш бўйича ишларни давом эттиришни режалаштирмоқда. Улар Эрон ва «унинг ёрдамчилари»дан ҳужумларни тўхтатишни талаб қилди. Улар, шунингдек, Ғазо секторидаги инқирозга барҳам бериш, «зудлик билан ва барқарор» ўт очишни тўхтатиш ва ҲАМАС ҳаракати томонидан гаровга олинганларни озод қилишга интилиш ниятида эканини таъкидлади. 

БМТ бош котиби: Дунё яна бир урушни бошидан кечира олмайди

БМТ бош котиби Антониу Гутерриш ҳам Эроннинг Исроилга ҳужумини қоралади. «На минтақа, на дунё яна бир урушни бошидан кечира олмайди», деди у ва «бу ҳарбий ҳаракатларни зудлик билан тўхтатишга» чақирди. Гутерришнинг таъкидлашича, гап Исроилга «кенг кўламли ҳужум» ҳақида кетяпти.

Эроннинг Исроилга ҳужуми

14 апрелга ўтар кечаси Эрон Исроилга ҳаводан катта ҳужум уюштирди. Исроил мудофаа кучлари маълумотларига кўра, 170 та дрон, 120 дан ортиқ баллистик ракеталар ва 30 дан ортиқ қанотли ракеталар мамлакатга ҳужум қилишга уринган, бироқ Исроил ва унинг иттифоқчилари уларнинг 99 фоизини, аксариятини - мамлакат ташқарисида уриб туширишга муваффақ бўлган. Фақат бир нечта ракета Исроил ҳудудига етиб борди, жанубдаги авиабазага тушиб, «кичик зарар» келтирди», дейилади ЦАҲАЛ хабарида.

Эрондан ташқари, Исроилга ҳужумлар Яман ҳусийчилари, шунингдек, Ироқ ҳудудидан эронпараст гуруҳлар томонидан амалга оширилган. 

10 апрел куни Теҳрон Исроилга Сурия пойтахти Дамашқдаги Эрон консуллиги биносига уюштирилган ҳужум учун жавоб қайтариш билан таҳдид қилган эди. Ҳужум оқибатида Ислом инқилоби муҳофизлари корпусининг етти нафар аъзоси, жумладан, икки генерал ҳалок бўлди. Шундан сўнг Эроннинг олий етакчиси Оятуллоҳ Али Хоманаий «сионистик режим жазоланишини» айтди.