Ўзбекистон сузиш федерацияси мансабдорлари томонидан 2 млрд сўмдан ошиқ маблағ талон-торож қилинди

Прокуратура органлари томонидан ўтказилган назорат тадбирида Ўзбекистон сузиш федерацияси мансабдор шахслари катта миқдордаги пулларни талон-торож қилгани аниқланган. Бу ҳақда Бош прокуратура матбуот котиби хабар бермоқда.

Хусусан, федерация мансабдор шахслари томонидан сузиш спорти учун ажратилган пуллар ҳисобидан терма жамоа аъзоси бўлмаган, аслида федерация бош котиби А.Г.нинг оила аъзолари Н.Г., М.Г ва яна 15 нафар фуқарони Туркияга дам олишга юборилиб, 405 млн сўм маблағ талон-торож қилинган.

Шунингдек, амалда ўтилмаган ўқув-машғулот йиғинлар ҳақида сохта буйруқлар чиқарилиб, 458 млн сўм ўзлаштирилган.

Бундан ташқари, федерацияга халқаро мусобақа ва ўқув машғулотлари ўтказиш учун ҳомийлар томонидан ажратилган 1,2 млрд сўм мақсадсиз сарфланиб, талон-торож қилинган.

Қайд этилишича, аниқланган ҳолат юзасидан жиноят иши қўзғатилиб, дастлабки тергов ҳаракатлари олиб борилмоқда.