17 сентябр куни Бойсундаги М25 конида содир бўлган авария 4 кишини ҳаётдан олиб кетди. Марҳумларнинг яқинларига кўра, коннинг бошқа қудуқларида ишловчи ходимлар ўша куни тозалаш ишларини бажариш учун “оғзи ёпилган” қудуққа жалб қилинган. Кутилмаган авария эса ҳалокатли якунланган. Бойсунда бўлиб турган Kun.uz мухбири марҳумларнинг яқинлари билан суҳбатлашди.

М25 конида авария содир бўлиши оқибатида 4 киши ҳалок бўлган ва 11 киши жароҳатланганди. Kun.uz мухбири бахтсиз ҳодисада ҳалок бўлган ходимларнинг яқинлари билан суҳбатлашди.

Марҳумларнинг яқинлари бу ҳалокатда техник носозлик дейилгани билан масъулларнинг ҳам айби борлигини, ишчиларни бир неча кун ўтмасдан “заливка” қилинган қудуқ ёнига олиб боришганини айтишмоқда.

Жумладан, марҳумлардан бирининг қариндоши Саломат Тангирқулова шундай дейди:

“Биринчи портлаш 1 сентябрда бўлди. Ҳаммамиз уйда эдик. Кечқурун қишлоқдан чиқиб кетинглар, деган хабар келди. Шаҳарга чиқиб кетдик биз. Кейин ёпилди деган хабар келди. 17 сентябр куни эса бирдан қарсиллаган овоз эшитилди. Тез ёрдам машиналари ўта бошлади.

Турмуш ўртоғим хавотирга туша бошлади. Мен унга хавотирга тушмасликни, жияни бошқа “буровой”да ишлашини айтдим. Йўқ, негадир хавотирга тушдим, деди.

Йигитни шу куни тозалашга олиб борган экан. Кейин қўшним қўнғироқ қилиб, турмуш ўртоғимни бир киши сўраётганини айтди. У киши хўжайинимга жиянининг аҳволи оғир эканлигини, тез боришини маълум қилди.

Турмуш ўртоғим ва ўғлим шошиб чиқиб кетишди. Боришса аллақачон моргга олиб кетишган экан. Шундай қилиб кечаси олиб келишди. Йигитни бизга кўрсатмади, бош томонида жароҳати бор экан. Кийимлари ботқоқ экан. Қандай ботқоқ бўлган у ерда, билмадим.

Техник носозлик дейишгани билан ўша ердаги мутахассисларнинг озроқ айби бўлган. Бугун ёпилган “буровой”нинг остига шунча йигитни ўлимнинг оғзига олиб боргандай бўлганда.

Икки йил олдин ҳамма бирлашиб, уйлантиргандик. Хотини иккинчи фарзандига ҳомиладор эди.

Бу йигитнинг онасининг ноласига чидаш қийин: газ бир томон, онанинг ноласи бир томон бўлиб турибди. Бировга ёмон гапирадиган болалар эмасди.