DW ўзининг араб таҳририяти мухбирига қилинган ҳужумни қоралади

Германиянинг Deutsche Welle (DW) медиа компанияси 12 октябр, шанбага ўтар кечаси ўзининг араб таҳририяти бўлими мухбири Адонис Алҳалед билан юз берган «жирканч зўравонлик ҳаракатини» қоралади. Бу ҳақда 13 октябр, якшанба куни чоп этилган DW пресс-релизида айтилади.

Адонис Алҳаледнинг сўзларига кўра, у ва ҳамкасби Дюсселдорфдаги Mitsubishi Electric концерт майдонида суриялик мусиқачи Ал Шами билан суҳбатни ёзиб олишганидан сўнг хавфсизлик тизимидан таҳдид ва ҳақоратларга учраган. Хусусан, қўриқчилар Алҳалед ва унинг ҳамкасбини ҳақоратли ва беҳаё сўзлар билан сўккан, шундан сўнг, журналистнинг сўзларига кўра, улар уни интервю майдонидан ҳовлига итариб юборишган. Соқчилардан бири DW мухбирини бир неча марта урган.

Адонис Алҳалед тез ёрдам бўлинмасига олиб кетилди. 12 октябр, шанба куни эрталаб у касалхонадан чиқиб, жиноий иш қўзғатишга ариза берган. Дюсселдорф полицияси ўша куни кечқурун тергов бошлади. Ҳодисанинг видеоёзувлари «сақланади ва ўрганилади», деб хабар берди DW.

DW бош директори Питер Лимбург Адонис Алҳаледга қилинган ҳужумни кескин қоралашини айтди. «Бу жиноят нафақат жирканч зўравонлик ҳаракати, балки матбуот эркинлигига ҳужумдир. Жиноятчилар қонуннинг тўлиқ кучига дуч келишлари керак», деди у ва «барча DW ходимларининг бирдамлиги» ҳақида маълум қилди. У, шунингдек, артист Ал Шамини «бу ҳаракатдан узоқлашишга» чақирди.