Кейинги 3 йилда доллар курси қандай бўлади? – прогнозлар

Ўзбекистон томони АҚШ долларининг сўмга нисбатан ўртача йиллик қиймати 2027 йилда 14 150 сўм бўлишини, S&P халқаро рейтинг агентлиги эса 15 000 сўмга етишини прогноз қиляпти.

Фото: Kun.uz/Муҳаммаджон Ғаниев

Ўзбекистон Марказий банки 17 декабр кунги савдолар учун 1 АҚШ долларининг сўмга нисбатан курсини 12 874 сўм этиб белгилади. Йил бошидан буён сўмнинг Америка валютасига нисбатан қадрсизланиши 4,4 фоизни ташкил этяпти.

2025 йилги давлат бюджети параметрларида доллар курси ўртача йиллик 13 250 сўмдан ҳисобланган. Бу кўрсаткич 2026 йилда 13 725 сўм, 2027 йилда 14 150 сўм бўлиши прогноз қилиняпти.

S&P халқаро рейтинг агентлигига кўра, ўзбек сўмининг долларга нисбатан ўртача курси кейинги йиллар давомида қуйидагича бўлиши мумкин.

2025 йилнинг охирида – 13 650 сўм;
2026 йилнинг охирида – 14 300 сўм;
2027 йилнинг охирида – 15 000 сўм.

Сўмнинг долларга нисбатан курсини аниқ прогноз қилиш жуда мураккаб, чунки бу кўплаб омилларга боғлиқ. Хусусан, Ўзбекистонда иқтисодий ўсиш яхши бўлса, сўмнинг долларга нисбатан қадрсизланиши секинлашади. Аксинча, мамлакатда инфляция даражаси ошиб кетса, сўмнинг қадри пасаяди. Ташқи савдода экспорт-импорт баланси ҳам миллий валюта қийматининг шаклланишида муҳим аҳамият касб этади.

#доллар #прогноз #девалвация