Россияда «чет эл агентлари» 1,5 йилда 25 млн рубл жаримага тортилди

2023 йил бошидан 2024 йил ўрталаригача бўлган 1,5 йил давомида Россия судлари Россия ҳукумати «чет эл агентлари» деб ҳисоблаган шахсларга жами 25,8 миллион рубл миқдорида 620 та жарима солди. Бу ҳақда 6 январ, душанба куни ТАСС давлат агентлиги Россия Олий суди суд департаментига таяниб хабар берди.

«2023 йилда Россия Федерацияси Маъмурий жавобгарлик тўғрисидаги кодексининг 19.34-моддаси (чет эл агенти фаолияти тартибини бузиш) бўйича жами 15 миллион 172 минг рубл миқдорида жарима солиш бўйича 368 та қарор қабул қилинди; 2024 йилнинг биринчи ярмида ушбу модда бўйича жами 10 миллион 641 минг рубл миқдорида 252 та жарима солинган», — дейилади нашрда.

Таъкидланишича, «бу маблағларнинг 3,996 миллион рубли 1,5 йил давомида ундирилган ёки ихтиёрий равишда тўланган». Бутун 2024 йил учун «чет эл агентлари»га жарималар тўғрисидаги маълумотлар баҳорда умумлаштирилиши кутилмоқда.

ТАСС агентлиги келтирган суд статистикасига кўра, юқорида қайд этилган даврда «чет эл агенти» фаолияти тартибини бузганлик учун жисмоний шахслар 471 та ҳолатда, юридик шахслар 70 та ҳолатда ва ташкилотларнинг мансабдор шахслари 67 та ҳолатда жавобгарликка тортилган. «2024 йилнинг биринчи ярмида жаримага тортилган 252 нафар фуқаронинг 57 нафари аёллардир. Бешта ҳолатда хорижий фуқароларга жарима солинди», — дейилади агентлик хабарида.

Маълумотларга кўра, Россия Адлия вазирлиги томонидан 2022 йил декабридан бери юритилаётган «чет эл агентлари» реестрида ҳозирда 906 нафар жисмоний шахсларнинг исми ва ташкилотларнинг номлари мавжуд.

Россияда «Трансперенси» ва Лигалайз «чет эл агентлари» деб эълон қилинди

Россия Адлия вазирлиги коррупцияга қарши «Трансперенси Интернешнл-Россия в изгнании» («ТИ-Россия в изгнании»), рэпер Лигалайз (Андрей Меншиков), журналистлар Алексей Ковалёв ва Данил Беляков, «Страна и мир. Sakharov Review» нашриёти, православ руҳонийси Андрей Лвовни «чет эл агентлари» деб эълон қилди. «Чет эл агентлари»нинг янгиланган реестри 27 декабр куни вазирлик сайтида эълон қилинди.

2015 йилда «Трансперенси Интернешнл-Россия» («ТИ-Россия»)  юридик шахси Россия Федерациясида «чет эл агентлари» реестрига киритилган. Бироқ, Россия Бош прокуратураси Transparency International халқаро ҳаракатини «номақбул ташкилот» деб тан олганидан сўнг, «ТИ-Россия» тугатилди. 2023 йилнинг кузидан буён ташкилот «Трансперенси Интернешнл-Россия в изгнании» номи остида фаолиятини хорижда давом эттиряпти.

«ТИ-Россия в изгнании» вакили DW'га «хавфсиз юрисдикциядан ўзгармаган ҳолда ўз ишини давом эттиришини» билдирди. «Биз Transparency International халқаро ҳаракатининг мамлакатдан ташқарида фаолият юритаётган ягона бўлимимиз. Россияда соғлом жамият қуриш инсон ҳуқуқлари фаоллари, сиёсий мухолифлар ва журналистларни таъқиб қилишга асосланиши керак эмас, деб ҳисоблаймиз», — дейилади ташкилот хабарида.