“Жарима чиптасизлар учун” – Тошкент автобусларида йўлкирани нақд пулда тўлайдиганларга жарима солиниши рад этилди

4 январ куни Ўзбекистон миллий ахборот агентлиги (ЎзА) Тошкент шаҳридаги автобусларда 2025 йил 1 январдан бошлаб йўлкирани нақд пулда тўлаш амалиёти тугатилишига оид расмийлар билан интервю эълон қилди. Унда Транспорт назорат инспекциясининг пойтахт ҳудудий бўлими инспектори Салимжон Нишонбоев нақд пулда тўлов қилувчилар жаримага солинишини айтиб ўтган. (Ҳозирда хабар таҳрир қилиниб, чиптасиз йўловчилар жаримага солиниши қайд этилган – таҳририят)

Нишонбоев нақд тўловларни қабул қилишда ҳайдовчилар учун ҳам, йўловчилар учун ҳам маъмурий жавобгарлик назарда тутилганини эслатган. Инспектор интервюда бундай ҳолатларда дастлаб йўловчилар ва ҳайдовчилар огоҳлантирилиши, кейин эса улар МЖтКнинг 144 (Чиптасиз саёҳат) ва 145 (Йўловчиларни чиптасиз ташиш) моддалари бўйича жаримага тортилишини таъкидлаган. Чиптасиз саёҳат қилганлик учун жарима БҲМнинг 1/10 қисмини ёки 37,5 минг сўмни ташкил этиши қайд этилган. Kun.uz ҳам ЎзА берган маълумотларга таяниб ушбу хабарни эълон қилганди.

Масъулнинг бу чиқиши тармоқларда турли эътирозларни келтириб чиқарди. Транспорт вазирлиги эса Kun.uz'га инспекция вакили адашиб хато маълумот берганини маълум қилди.

Шунингдек, вазирлик ўзининг Telegram'даги каналида расмий муносабат билдириб, нақд пулда тўлов қилувчилар жаримага тортилишини рад этди.

“Ижтимоий тармоқлар орқали Тошкент шаҳар автобус йўналишларида нақд пулда тўлов қилган йўловчилар жаримага тортилиши тўғрисида асоссиз маълумотлар жойланмоқда.

Ўзбекистон Республикасининг Маъмурий жавобгарлик тўғрисидаги кодекси 144-моддасида йўловчининг троллейбусда, трамвайда, шаҳар ичида ва шаҳар атрофига қатнайдиган автобусда чиптасиз юриши — БҲМнинг ўндан бир қисми миқдорида жарима солишга сабаб бўлиши белгиланган”,– дейилади расмий муносабатда.

Содда қилиб тушунтирилса, бундан кейин автобусда чиптасиз ҳаракатланган шахслар 37,5 минг миқдорида жаримага солинади.

“Янги тизим бўлгани учун айни ҳозирдан бу амалиёт қўлланмайди, махсус тузилган ишчи гуруҳларимиз кузатиб, биринчи огоҳлантиришлар бериб боришади, кейинроқ нақд пул тушумлари камайиб, электрон шаклдаги тўловларимиз ошиб бориши биланоқ бизда буни мониторинг қилиш имконияти ортиб, чиптасиз йўловчиларни жаримага солиш бошланади”, – дейди Kun.uz'нинг вазирликдаги манбаси.

Эслатиб ўтамиз, 2025 йил 1 январдан бошлаб Тошкентда автобусга нақд пулда тўлов қилиш тўлиқ тугатилиб, бунинг учун чипталарни фақат инфокиосклар орқали 3 минг сўмга бир марталик чипта олиш ёки АТТО, банк карталари, мобил иловалар орқали тўлов қилиш мумкин бўлиб қолди.

Ўз ўрнида, электрон тўловларнинг афзаллиги бўлиб, йўл ҳақи 1 700 сўмни ташкил қилади. Бир соат ичида бир нечта автобуслардан фойдаланиш эса арзонлашади, масалан, 1-мартасига 1 700 сўм, 2-мартасига 700 сўм, 3-мартасига эса бепул.

Аввалроқ Тошкент шаҳар транспорт бош бошқармаси бошлиғи Миракбар Икромов Kun.uz билан суҳбатда пойтахтда 2 600 та автобекат мавжудлигини, уларнинг 300 дан ортиғида автобус учун бир марталик QR-чипталарни олиш шохобчалари мавжуд эмаслигини айтганди. Масъул айни дамда пойтахтдаги мавжуд 5000 га яқин инфокиоскларни тизимга интеграция қилиш ишлари кетаётганлигини таъкидлаганди.