Фармацевтика агентлиги раҳбари Kun.uz билан суҳбатда рецептсиз сотиладиган дорилар нархига чеклов бекор қилинаётганини халқаро тажриба билан изоҳлади. Унинг айтишича, 15 февралгача дори қутисидаги QR код асосида унинг рухсат этилган максимал нархини кўрсатувчи илова ишга туширилади. Дори воситаларига ҚҚС ставкаси қайта кўриб чиқилади. Дорихонадан дори сотиб олиб, сифатини текшириш йўлга қўйилади.
Фармацевтика соҳаси бўйича 28 январ куни имзоланган президент фармонига асосан, 2025 йил 1 апрелдан бошлаб рецептсиз сотиладиган дориларга нисбатан нарх чеклови бекор қилинмоқда. Бу нархлар сунъий оширилиши мумкин деган хавотирларга сабаб бўляпти. Фармацевтика агентлиги директори Абдулла Азизов Kun.uz'га берган интервюсида чекловнинг олиб ташланиши аксинча рақобатга таъсир қилиб, нарх пасайишини айтди.
Унинг сўзларига кўра, ҳозирда Ўзбекистонда 9 500 та дори воситалари рўйхатдан ўтказилган бўлиб, шундан 1 500 таси рецептсиз сотилади.
“Барча ўрганган давлатларимизда рецепт билан бериладиган дори воситалари нархини назорат қилиш механизми мавжуд, лекин рецептсиз бериладиган дори воситалари, яъни сиз оғир касал бўлганингизда энг зарурий бўлмаган, фақат ўзингизга қўшимча сифатида олиш мумкин бўлган дори воситалари нархига эса ҳеч қандай давлат назорати қўйилмаган.
Яъни рецептсиз бериладиган дори воситаларни сотишда дорихоналар бир-бири билан рақобатга киришиши, нархни тушириши ёки ошириши мумкин – ўзининг фойдасидан келиб чиқади. Рецепт билан бериладиган дори тоифалари эса ижтимоий соҳа бўлиб, инсон саломатлигига тўғридан тўғри боғлиқ. Шунинг учун Ўзбекистонда биз ҳам шундай тартибни жорий этяпмиз.
“Халқимиз асосан гўшт нархини эмас, дори нархини гапиряпти”, деб давлат раҳбаримиз ҳам кўп айтдилар. Бу бўйича яна бир топшириқ берганлар. Март ойигача Иқтисодиёт ва молия вазирлиги ва Солиқ қўмитаси билан дори воситаларига киритилган ҚҚСни қайтадан кўриб чиқишимиз керак. Қандайдир енгиллик яратиш имконияти бўлса, ўрганиб, таклиф киритишимиз керак. Бу ҳам нархларни янаям тушириш имкониятини яратади.
Ҳозирги кунда референт нархлар бўйича олиб бораётган фаолиятимиз ҳам тўғридан тўғри нархларнинг тушишига олиб келади. Ижтимоий назоратнинг кескинлашиши ҳам нарх тушишига олиб келади. Бу фармон билан биз тўғри механизмни йўлга қўйиш орқали, кутишимиз керак бўлган нарса – нархлар тушиши. Олдимизга ҳеч қандай нарх ошиши мақсад қилиб қўйилмаган, фақатгина муҳим дори воситаларининг нархи тушиши кутилади.
