Трамп: АҚШ Ғазо секторини назорат остига олади

АҚШ президенти Доналд Трамп АҚШ Ғазо секторини назорат остига олишини айтди. Республикачи бу ҳақда 4 феврал, сешанба куни Оқ уйда Исроил бош вазири Бинямин Нетаняҳу билан учрашувдан сўнг гапирди. Матбуот анжумани Американинг Associated Press(AP) ахборот агентлиги томонидан трансляция қилинди.

Трамп Ғазо бўйича: «Биз унга эгалик қиламиз»

«Қўшма Штатлар Ғазо секторини назорат қилади, биз у билан ишлаймиз, - деди Оқ уй раҳбари. - Биз унга эгалик қиламиз ва у ердаги барча хавфли портламаган бомбалар ва бошқа қуролларни демонтаж қилиш учун жавобгар бўламиз».

«Агар керак бўлса, буни қиламиз, бу участкани назоратга оламиз, ривожлантирамиз, минглаб иш ўринларини яратамиз. Бу бутун Яқин Шарқ фахрланиши мумкин бўлган нарса бўлади», деб қўшимча қилди Трамп. У ерда ким яшаши ҳақидаги саволга республикачи Ғазо сектори «дунё халқи» ва «Яқин Шарқ ривера»си учун уйга айланиши мумкинлигини айтди.

«Мен узоқ муддатли эгалик ҳолатини кўрмоқдаман ва мен буни Яқин Шарқнинг бу қисмига катта барқарорлик олиб келадиган нарса сифатида кўраман, - деб давом этди Трамп. - Мен буни кўп ойлардан бери диққат билан кўриб чиқдим». Ғазога АҚШ қўшинларини жўнатиш керакми деган саволга, Трамп: «Биз керакли нарсани қиламиз», деди.

«Мен Исроилни яхши кўраман. Мен у ерга бораман, Ғазога бораман, Саудия Арабистони ва бутун Яқин Шарқдаги бошқа жойларга бораман», — деб ваъда қилди Оқ уй раҳбари.

Нетаняҳу бу сўзларни ижобий қабул қилди. Исроил бош вазирининг сўзларига кўра, Трамп «янги ғоялар билан ўйлайди» ва «анъанавий фикрлашни йўқ қилишга тайёрлигини намойиш этади».