Внуковода АҚШ фуқароси таркибида каннабиноидлар бўлган мармелад туфайли қўлга олинди

Москванинг Внуково аэропортида АҚШ фуқароси қўлга олинди. Бу ҳақда 14 феврал, жума куни Федерал божхона хизмати матбуот бюросига таяниб, «Интерфакс» хабар берди. «7 феврал куни Внуково божхоначилари ўз багажида каннабиноид моддаси бўлган мармелад олиб кетаётган 28 ёшли АҚШ фуқаросини қўлга олди. Эркак Истанбулдан келган», — дейилади агентлик хабарида.

Федерал божхона хизматининг қайд этишича, америкаликка нисбатан катта миқдордаги наркотик моддаларни олиб ўтиш моддаси бўйича жиноий иш қўзғатилган, бунинг учун у 1 миллион рублгача жарима ва 5 йилдан 10 йилгача муддатга озодликдан маҳрум этилиши мумкин. Ҳозирда эркак ҳибсга олинган.

АҚШ фуқароси қўлга олингани ҳақида биринчи бўлиб 14 феврал куни эрталаб Mash Telegram-канали хабар берди. Унинг маълумотларига кўра, эркакда «мармеладли драже ичига яширилган ярим килограмм марихуана» борлиги аниқланган. «Агентство» нашри таъкидлаганидек, Mash дастлаб америкалик 13 феврал куни америкалик Марк Фогел билан алмашиш доирасида АҚШдан озод қилинган Россия фуқароси Александр Винник Внуковога учиб келганида ҳибсга олинганини ёзган. Бироқ, кейинчалик Mash хабарни таҳрир қилиб, Винник ҳақидаги эслатмани олиб ташлади ва америкалик ҳибсга олинган санани 7 февралга ўзгартирди.

Шу билан бирга, «Агентство» 10 феврал куни Москванинг Солнцевский район суди «Байерс К.У.»ни ўхшаш модда бўйича иш юзасидан ҳибсга олганини аниқлади. Федерал божхона хизмати ҳибсга олинган шахснинг исмини ошкор қилмади.

Марк Фогелнинг Александр Винникка алмаштирилиши

2025 йил 11 февралда Россия 2021 йилда Шереметево аэропортида ҳибсга олинган АҚШ фуқароси Марк Фогелни қамоқдан озод қилди. Унга гиёҳвандлик воситалари ва психотроп моддаларни контрабанда ва қонунга хилоф равишда олиш, сақлаш, ташиш ва ишлаб чиқариш айблови қўйилган. Фогел инглиз-америка мактабида дарс берган ва аввалроқ АҚШнинг Москвадаги элчихонаси ходими эди. 2021 йилнинг майигача у дипломатик мақомга эга бўлган.

2022 йилда Фогел 14 йилга қаттиқ режимдаги қамоқ жазосига ҳукм қилинди. Америкалик умуртқа операциясидан кейин тиббий сабабларга кўра марихуана истеъмол қилганини билдирган.

Кейинчалик, 14 февралга ўтар кечаси ТАСС ва "Интерфакс" ахборот агентликлари BTC-e онлайн биржаси асосчиси ва 2017 йил ёзида Греция шимолида Қўшма Штатлар талаби билан қўлга олинган Россия фуқароси Александр Винник бўлган самолёт Вашингтон билан маҳбуслар алмашинуви доирасида Москвага етиб келганини маълум қилди.

Эркак товламачилик, шахсий маълумотларни ўғирлаш ва гиёҳванд моддалар савдосига ёрдам беришда айбланган. 2024 йилда у пул ювиш бўйича фитна уюштирганликда айбини тан олди. У 4 миллиард долларни ювганликда айбланиб, АҚШда 50 йиллик қамоқ жазосига ҳукм қилинган. Винник 2022 йил августида АҚШга экстрадиция қилинганди.