Барча ҳудудларда креатив парклар ташкил этилади

Ўзбекистонда креатив индустрия парклари энди ҳудудларда ҳам барпо этилади. Бу ҳақда президентнинг ёшлар билан мулоқоти давомида маълум қилинди.

Фото: Президент матбуот хизмати

Тошкент шаҳридаги “Ёшлар ижод саройи”да намунавий креатив парк ташкил қилинганди. Давлат раҳбари энди креатив индустрия парклари ҳудудларда ҳам барпо этилишини айтди. Улар зарур ресурс ва инфратузилма билан таъминланади.

Ёшлар билан мулоқот давомида маълум қилинишича, креатив индустрия парки резидентларига 2030 йил якунигача имтиёзли солиқ режими жорий этилади. Бунда ижтимоий ва даромад солиқ ставкалари 50 фоизга камайтирилади, резидентлар товарларни реализация қилиш ҳажмидан қатъи назар айланмадан олинадиган солиқ тўловчилар бўлади.

Парклар негизида креатив соҳа вакилларини ўқитадиган бизнес мактаблари ташкил қилинади. Ушбу мактабларда ёшлар янги ва замонавий бизнес юритиш ҳамда электрон тижорат каби хизмат кўрсатишнинг инновацион усулларини ўрганади.