Тошкентда Ҳунармандлар маркази қурилиши керак бўлган ерга қурилган “дом” бузиладиган бўлди

Тошкентда бир неча йилдан бери ҳунармандлар ва “Turon meros” МЧЖ ўртасида баҳсли вазият давом этиб келаётганди. Низоли вазият Учтепа туманида Ҳунармандлар маркази қурилиши билан боғлиқ.

Гап шундаки, Сузукота мажмуаси қурилиши муносабати билан ҳунармандларга тегишли устахоналар бузилгач, 2019 йил 26 майдаги ҳукумат сайёр йиғилиши баёни билан Учтепа тумани Фозилтепа кўчасида жойлашган 2,7 гектар ер майдонида “Ҳунармандлар гузари” маркази қурилиши ҳамда ҳунармандларнинг бузилган мулкларига компенсация сифатида қуриладиган бинонинг биринчи қаватидан 52 нафар ҳунарманд учун жами майдони 12 минг 204 метр квадрат бўлган хоналар ажратиб берилиши белгиланганди.

Бироқ Учтепа туманида барпо этилиши керак бўлган 4 қаватли ҳунармандлар маскани қурилиши бошлангач, “бир юмалаб” кўп қаватли турар жойга айланиб қолган. Яъни ҳужжатларда ушбу ҳудудда 4 қаватли бино қурилиши ва унда ҳунармандлар фаолият кўрсатиши учун барча шароитлар яратилиши кўзда тутилган бўлса-да, Ҳунармандлар маркази учун ажратилган жойда инвестор томонидан 9 қаватли уй қурила бошланган. 

Фуқаролик ишлари бўйича Учтепа туманлараро судининг 2024 йил 25 октябрдаги қарори билан Тошкент шаҳар қурилиш соҳасида назорат инспекциясининг “Turon meros” МЧЖга нисбатан ноқонуний қурилган қурилмани бузиш ҳақидаги даъвоси қаноатлантирилган. Суд ҳужжатига кўра, Учтепа тумани, 178-уй манзилида жойлашган 9 қаватли бинони “Turon meros” МЧЖ ҳисобидан бузиб ташлаш белгиланган.

Тошкент шаҳар суди фуқаролик ишлари бўйича судлов ҳайъати апелляция инстанциясининг 2025 йил 5 февралдаги ажрими билан дастлабки суд қарори ўзгаришсиз қолдирилган. Ҳозирда иш тафтиш инстанциясида кўриб чиқилмоқда. 

Kun.uz 2022 йил декабр ойида Учтепа туманида 4 қаватли Ҳунармандлар маркази қурилиши керак бўлган жойда 9 қаватли “дом” қурилаётгани, ҳунармандлар эса бундан норозилиги ҳақида суриштирув эълон қилганди.