Оммавий тартибсизликлар содир этиш мақсадида ўқувдан ўтганлар 7 йилгача озодликдан маҳрум қилиниши мумкин

27 март куни қабул қилинган қонун билан Жиноят кодексига ўзгартиришлар киритилди. Бу ҳақда Адлия вазирлиги «Ҳуқуқий ахборот» каналида хабар берилди. Хусусан, Жиноят кодексининг 244-моддасига оммавий тартибсизликлар содир этиш мақсадида ўқувдан ўтганлик ҳамда ушбу фаолиятни молиялаштирганлик учун жавобгарликни белгиловчи ўзгартириш киритилди.

Қонунга кўра, шахснинг оммавий тартибсизликлар содир этиш мақсадида ўқувдан ўтиши, шу жумладан оммавий тартибсизликларни содир этиш билимини, амалий маҳоратини ва кўникмаларини эгаллаши, ўқув чоғида қурол-яроғ, портлатиш қурилмалари, портловчи, заҳарловчи, атрофдагилар учун хавф туғдирадиган бошқа моддалар ва буюмлар билан муомала қилиш усулларини ўрганиши:

●     БҲМнинг 300 бараваридан 600 бараваригача миқдорда жарима ёки 3 йилгача ахлоқ тузатиш ишлари ёхуд 5 йилдан 7 йилгача озодликдан маҳрум қилиш билан жазоланиши белгиланди.

Шунингдек, ушбу жиноятни содир этган шахс, агар у ўқувдан ўтганлиги тўғрисида ҳокимият органларига ихтиёрий равишда хабар қилса, содир этилган жиноятни фош қилишга ёки бундай ўқувдан ўтган, ўқувни амалга оширган, ташкил этган ёхуд молиялаштирган бошқа шахсларни, шунингдек ўқув ўтказилган жойни аниқлашга фаол кўмаклашса ва агар унинг ҳаракатларида жиноятнинг бошқа таркиби мавжуд бўлмаса, жиноий жавобгарликдан озод қилинади.

Қонун расмий эълон қилинган кундан эътиборан кучга киради. Адлия вазирлиги қонуннинг тўлиқ матнини эълон қилмади.

2024 йил декабр ойида Олий Мажлис Қонунчилик палатаси мажлисида ушбу қонун ҳақида бош прокурор ўринбосари Светлана Ортиқова маълумот берган эди. Ортиқова бу жазо онлайн тарздаги ўқувларда қатнашаётган шахсларга ҳам тааллуқли бўлишини, бундай ўқувларда кимдир билиб, кимдир билмай қатнашишини айтганди.