​​​​​​​БАА суди роҳиб қотиллигида гумон қилинган ўзбекистонликларни ўлимга ҳукм қилди – ОАВ

Бирлашган Араб Амирликлари суди ўтган йилнинг ноябрида роҳиб Цви Коганни ўлдиришда гумон қилинган уч нафар ўзбекистонликни ўлимга ҳукм қилди. Бу ҳақда Исроил ҳукуматидаги расмий манбаларга таяниб, Ynetnews хабар берди.

Нашрга кўра, ҳукм 30 март куни чиқарилган. Бироқ, БАА расмийлари томонидан эълон қилинмаган. Ўзбекистон Ташқи ишлар вазирлиги бу масала бўйича ҳали расмий баёнот бермади.

Шу билан бирга, ижтимоий тармоқларда судланувчилардан бирининг яқин қариндошлари билан суҳбати аудиоси тарқалмоқда. Унда айтилишича, «учала гумондорга ҳам ўлим жазоси тайинланган». Аудионинг ҳақиқий экани тасдиқланмаган.

Эслатиб ўтамиз, 2024 йил ноябр ойида роҳиб Коган дом-дараксиз йўқолган, кўп ўтмай БАА полицияси унинг жасадини зўравонлик излари билан топганди.

Кейинчалик БАА Ички ишлар вазирлиги томонидан уч нафар гумондор қўлга олинди, улар – Маҳмуджон Абдураҳим ўғли Кенжабоев, Азизбек Комилович Исмоилов, Олимбой Тоҳирович Давлатёров бўлиб, барчаси Ўзбекистон фуқароси.

БАА расмийлари жиноятнинг мотивлари ҳақида хабар бермади. Исроилнинг таъкидлашича, бу «антисемитизм билан суғорилган террорчилик акти».