“Деразани очишим билан таҳоратхона портлаб кетди”: Избоскандаги масжиддан репортаж
|20:42 / 05.04.202531 2927 мин
31 март куни Андижон вилояти Избоскан туманидаги “Аҳмадали ҳожи” жоме масжиди таҳоратхонасида газ портлаши оқибатида 4 киши вафот этди. Яна 10 киши эса турли жароҳатлар билан шифохонада даволанмоқда. Kun.uz мухбири воқеа жойида бўлиб тафсилотларни ўрганди.
Масжидга борганимизда айнан портлаган таҳоратхона таг-туги билан тозаланган, туташ таҳоратхона биносида эса ҳашар йўли билан тозалаш ишлари олиб борилаётган экан. Бироздан кейин махсус техникалар ёрдамида кейинги таҳоратхона биноси ҳам бузиб ташланди.
“Масжид таҳоратхонаси 2022 йил қурилиши бошланиб 2024 йилда фойдаланишга топширилган эди.
Ҳайит кунининг эртаси соат 12:15 лар чамаси эди. Пешинга ҳаракат қилиб тургандим. Тўсатдан гумбурлаган овоз эшитилди. Чиқиб қарасак чанг-тўзон. Бино ер билан битта бўлган экан. Бино босиб қолган одамларни ташқарига чиқариб олдик. Вафот этганлар пешин намозини ўқиш учун таҳоратхонада тайёргарлик кўришаётган бўлган.
Иҳволдин Зуҳриддинов,масжид имом ноиби
Бино бир вақтнинг ўзида 60 киши таҳорат олиши мумкин бўлган жой эди. Таҳоратхона қурилган пайтидаёқ бинога газ тармоғи олиб келинган бўлган. Айни пайтда таҳоратхонани тиклаш ишларини олиб боряпмиз”, – дейди масжид имом ноиби Иҳволдин Зуҳриддинов.
Мавзуга оид
Ўлганлардан бири яқин дўстим эди
“Ўша куни уйда таҳорат олиб масжидга келиб пешин вақти киришини кутиб ўтирган эдим. 70 ёшга кирдим. 50 йилдан бери ҳар душанба куни намоздан кейин синфдошларим билан масжид рўпарасидаги чойхонада ош қилиб еймиз.
Оллоёр ота Собиров
Шу куни ҳам дўстларим билан йиғилишгандик. Ўлганларнинг бири яқин ошнам эди. У билан сўрашдим. Дўстим таҳорат олиб намоз ўқийман деди-да ичкарига кириб кетди. Орадан 10 минут ўтди чамаси бирдан таҳоратхона гумбурлаб ағдарилди. Ичкаридан 4-5 одамни олиб чиқишди. Шу орада ИИБ ходими дўстимни суратини кўтариб шу одамни ким танийди деб юрган экан. Не кўз билан кўрайки, суратдаги дўстим эди. Бир кам 70 ёшда эди.
Янаям Худо сақлади. Бозор масжидга туташ ҳудудда. Бозорчилар одатда тўлиб кетарди пешинга яқин. Агар ярим соатдан кейин портлаганда ўлим кўп бўларди”, – дейди яқин дўстидан айрилган Оллоёр ота Собиров.
Заправка портлади деб ўйладик
“Масжид ҳудудига туташ жойдаги бозорда қуруқ мевалар сотаман. Ошхонада овқатланаётган эдим. Бирдан масжид томондан портлаган овоз эшитилди. Тамаддихона ойналари портлаш кучидан зириллаб кетди. Портлаган томонда заправка бор эди.
Омонулло Мадаминов, воқеа гувоҳларидан бири
Аввалига шу заправка портлади деб ўйладик. Кирсак таҳоратхона портлаган экан. Одамларни ташқарига чиқаришга ёрдам қилдик. Яхшиямки таҳоратхонада одам кам эди. Талафот камроқ бўлди”, – дейди воқеа гувоҳларидан бири Омонулло Мадаминов.
“31 март куни соат тахминан 12:19 ларда Избоскан тумани Мирзо Улуғбек маҳалласида жойлашган масжидда ҳаво газ аралашмасининг чақнаши содир бўлганлиги юзасидан Андижон вилояти ФВБга хабар келиб тушди.
Ҳаётбек Раҳимов, Андижон вилояти ФВБ Ахборот хизмати бошлиғи
Тегишли идора вакиллари воқеа жойига келиб зарурий чоралар кўрилди. Бахтсиз ҳодисада 4 фуқаро вафот этиб, 10 нафари турли даражадаги тан жароҳатлари олди. Айни пайтда тергов ҳаракатлари олиб борилмоқда”, – деди Андижон вилояти ФВБ Ахборот хизмати бошлиғи Ҳаётбек Раҳимов.
Отам таҳоратхонага доим биринчи кирарди
“Масжиддаги портлашда вафот этганлардан бири отам бўлади. Ўша куни отам Ҳалимжон Абдуллаевнинг дўстлари билан оши бор эди.
Намоздан чиқиб одатда ҳафтанинг душанба куни ош қилиб йиғилишарди. Портлашда отамдан айрилдик. Таҳоратхонага кирган экан. Портлаш бўлгани ҳақида хабар беришди. Масжидга бориб отамни топа олмадим. Экспертизага олиб кетишган экан. Отам одатда оёғи оғригани учун жамоатдан олдинроқ ҳаракат қилиб вақтлироқ таҳоратхонага кирарди”, – дейди портлашда отасидан айрилган ўғил.
Деразани очишим билан бино портлади...
“Ишимдан бемалолроқ бўлганимда масжидга бориб турардим. 12:10 ларда масжидга пешин ўқиш учун бордим. Таҳоратхонага кираётганимда масжид ходимларидан бири котёлдан хабар олинг сув совиб кетди деб айтди. Подвалга тушиб эшикни очишимни биламан димоғимга газ ҳиди урилди. Иситиш мосламаси подвалда жойлашган эди-да.
Муҳаммадризо Абдураҳмонов
Котёл эшикдан тахминан 10 метр узоқликда жойлашган. Котёл олдига бориб энг аввало газни крандан беркитиб кичик ойналарни очишга тушдим. Чироқларни ёқмаган эдим. Деразаларни очишда давом этдим. Бирдан кучли портлаш бўлди. Устимга бетон плита тушди. Плита остида тахминан 1-1,5 соат қолиб кетдим. Дод деб бақириб одамларни ёрдамга чақирдим. Лекин мени ҳеч ким эшитмасди. Ниҳоят кимдир бақирган овозимни эшитди. Бетонлар орасидан олиб чиқишди.
Таҳоратхона ишга тушганига 10 ой бўлган бўлса сув иситиш тизимида бундай носозлик бирор марта кузатилмаган эди”, – дейди портлашнинг бевосита гувоҳи бўлган Муҳаммадризо Абдураҳмонов.
У айни пайтда Республика шошилинч тиббий ёрдам илмий маркази Андижон филиалининг куйиш бўлимида даволанмоқда.
Тиббиёт марказининг нейрохирургия бўлимида Иномжон Шомуродов ва Исомиддин Раҳимовлар ҳам даволанмоқда. Улар портлаш пайтида таҳоратхонада бўлган ва плита ёрилган пайтда ертўлага қулашган. Жароҳатларни ҳисобга олмаганда айни пайтда уларнинг ҳолати анча яхшиланган.
Иномжон Шомуродов, портлаш вақтида таҳоратхонада бўлган
Исомиддин Раҳимов, портлаш вақтида таҳоратхонада бўлган
Республика шошилинч тиббий ёрдам илмий маркази Андижон филиали директори ўринбосари Абдумуталиб Акбаралиевга кўра, бахтсиз ҳодисадан жабрланган 7 нафар бемор филиалга олиб келинган.
