WP: Европа Украинага тўғридан тўғри қурол етказиб бериш ўрнига унинг мудофаа саноатини қўллаб-қувватламоқчи

Европа Украинага қурол юбориш ўрнига мамлакатнинг мудофаа саноатини қўллаб-қувватлашни кучайтириш имкониятини кўриб чиқмоқда. Бу ҳақда европалик амалдорга таяниб The Washington Post хабар берди.

Ички муҳокамалардан хабардор WP суҳбатдошининг сўзларига кўра, Киевга бир неча йилдан бери қурол етказиб бераётгани сабаб Европанинг ўз захиралари тугаб бормоқда, шу боис «Украина мудофаа саноатига маблағ йўналтириш моделини кўриб чиқаётган давлатлар сони ошяпти».

Таъкидланишича, Жо Байден маъмурияти даврида етказиб берилган қуроллар захираси тугаб бораётгани сабаб Европа Америка ёрдамининг тўхтатилишини тўлиқ қоплай олишига бўлган шубҳалар тобора ортиб бормоқда.

WP манбасининг қайд этишича, Европа учун бу арзонга тушади, украиналиклар ҳам қурол ишлаб чиқариши керак ва ушбу стратегияни ҳар икки томон учун фойдали деб аташ мумкин. Шунингдек, бу НАТО давлатларига Украина ҳудудидан янги қурол турлари, хусусан, уларнинг тажрибаси кам бўлган дронлар устида синов ўтказиш полигони сифатида фойдаланиш имконини беради.

WP мисол тариқасида «Богдана» ғилдиракли ўзиюрар гаубицасини келтирган. Бу — НАТО калибрига мос келувчи биринчи Украина гаубица бўлиб, у мамлакат хавфсизлигини таъминлашда ёрдам бериши мумкин. Уруш давомида Европадаги иттифоқчилари билан ҳамкорлик доирасида «Богдана»ларни ишлаб чиқариш ҳажми кескин кўпайган — 2023 йилда ойига бундай қуроллардан олти дона ишлаб чиқарилган бўлса, 2025 йилда ушбу кўрсаткич 20 тадан ошган.

Эслатиб ўтамиз, 9 апрел куни Европа гаубицалар ишлаб чиқаришга 1 миллиард евро миқдорида қўшимча транш ажратилишини эълон қилганди — ушбу маблағлар Россиянинг музлатилган активларидан олинадиган даромадлар ҳисобидан қопланади. Таъкидланишича, бу Украина артиллерияси учун ажратилган энг катта маблағ ҳисобланади.