Аббос Файзуллаев Россияда Марказий Осиёнинг энг қиммат футболчиси бўлди

Футболчиларнинг трансфер қийматини баҳолашга ихтисослашган Transfermarkt портали Россия лигаларида (Премьер-лига ва Биринчи лига) тўп тепаётган футболчиларнинг қиймати ҳақидаги маълумотларни янгилади.

Россия Премьер-Лигасидаги марказий осиёлик футболчилар рейтингини Москванинг ЦСКА клубидан ўзбекистонлик яримҳимоячи Аббос Файзуллаев бошқариб турибди. Унинг трансфер қиймати 8 миллион евро - бу минтақа футболчилари учун мутлақ рекорддир.

Иккинчи ўринда қозоғистонлик «Зенит» ҳимоячиси Нурали Алип (3 миллион евро), учинчи ўринда яна бир қозоғистонлик – «Ахмат» клубидан Максим Самородов (2,5 миллион) жой олган.

«Ростов» клубининг тожикистонлик дарвозабони Рустам Ятимов 1,5 миллион евро нарх билан тўртинчи ўринда. Ўзбекистонлик Рустам Ашурматов («Рубин») ва қирғизистонлик Гулжигит Алиқулов («Торпедо») 5-ўринда (ҳар бири 600 минг еврога баҳоланган).

Россия чемпионатининг энг қиммат футболчиси Эдуард Сперцян бўлиб, россияликнинг нархи 25 миллион еврога баҳоланган. «Краснодар» етакчиси биринчи ўринни «Зенит» футболчиси Луис Энрике билан бўлишиб турибди. Кучли учликка «Зенит» яримҳимоячиси Вендел (Бразилия, 18 миллион евро) ҳам кирди.