ЖЧ–2026 саралаши, А гуруҳи, 10-тур
10 июн, сешанба, «Бунёдкор» стадиони
Ўзбекистон – Қатар 3:0
Голлар: Азиз Турғунбоев 28, Элдор Шомуродов 86, Игор Сергеев 90+2
Ўзбекистон: Юсупов, Ҳусанов, Алижонов (Тўхтахўжаев 90), Мозговой, Ҳамробеков (Бўриев 82), Машарипов (Эркинов 82), Насруллаев, Шомуродов (Игор Сергеев 90), Турғунбоев (Искандеров 62),Файзуллаев, Алиқулов.
Қатар: Салаҳ Закариё, Абдулла Юсуф, Аҳмад Суҳайл, Ҳомам ал Амин (Исмоил Муҳаммад 76), Бассам, Абдулазиз Ҳатим (ал Маннай 46), Аҳмад ал Ганеҳи (Эдмилсон 57), Амро Сураг (Мунтари 57), Ассим, Мустафо Мешал, Акрам Афиф (Абдилраҳмон Фаҳми 67).
Огоҳлантиришлар: Абдулазиз Ҳатим 33, Бассам 41, Афиф 67, Мунтари 67, Ҳумума 72.
Футбол бўйича Ўзбекистон миллий жамоаси ЖЧ-2026 саралаш турнирининг охирги турида Қатар устидан йирик ҳисобда ғалабага эришди. 10 июн куни Тошкентдаги «Бунёдкор» стадионида ўтказилган учрашув 3:0 ҳисобида мезбонлар ғалабаси билан якунланди.
Биринчи бўлимда Азиз Турғунбоев ҳисобни очди. У 28-дақиқада ўнг қанотда икки рақибдан ўтиб, жарима майдонига ёриб кирди ва тўпни тўсин остидан дарвоза тўрига киритиб, супергол муаллифига айланди.
Ўйин давомида мезбонлар тўлиқ устунликка эришди, биринчи бўлимда ҳам, иккинчи бўлимда ҳам жамоа етакчиси Элдор Шомуродовда ҳисобдаги фарқни ошириш учун етарлича имкониятлар бўлди. Аммо фақат 86-дақиқага келиб ўз мақсадига эришди. Иккинчи бўлимда захирадан ўйинга қўшилган Жамшид Искандеровнинг майдоннинг иккинчи қисмидан берган узатмасига етиб борган ҳужумчи бир ҳаракат билан тўпни ўзига бўйсундириб, иккинчи ҳаракатда меҳмонлар дарвозасини ишғол этди.
90+1-дақиқада эса Шомуродовнинг ўрнига майдонга туширилган Игор Сергеев бурчакдан оширилган тўпни дарвоза тўрига йўллади, бу унинг тўпга биринчи тегиниши эди. Эътиборли жиҳати, унга ҳам Искандеров ассистентлик қилди.
