Исроилда Ғазода уруш бошланганидан буён энг йирик намойишлар бўлиб ўтди (фото+видео)

Якшанба куни бўлиб ўтган умумхалқ намойишларида полиция ўнлаб кишиларни қўлга олди, норозиликларни бостириш учун жисмоний куч ва сув пуркагичлардан фойдаланди. Al-Jazeera нашрининг намойиш ташкилотчиларига таяниб ёзишича, 17 август куни кечга қадар фақат Тел-Авивнинг ўзида ярим миллионга яқин одам норозилик намойишига чиққан – бу уруш бошланганидан буён энг йирик ва кескин чиқишлардан бири бўлди.

Хусусан, «Гаровдагилар ва бедарак йўқолганлар оилалари форуми» Тел-Авивдаги митингга қарийб 500 минг киши қатнашганини билдирган. Аммо полиция бу рақамни тасдиқламади.

Almost 500,000 People Gathered in Hostages Square and Surrounding Streets to Make It Clear - The Entire People of Israel Want the Release of All the Hostages and End the War.

Credit: Yair Palti pic.twitter.com/NkTidIl96d

— Bring Them Home Now (@bringhomenow) August 17, 2025

Мамлакат бўйлаб мактаблар, корхоналар ва жамоат транспорти тўхтатилди. Бу ҳаракат асирлар оилалари ҳамда ҳалок бўлганлар оилаларини бирлаштирган икки гуруҳ ташаббуси билан ўтказилган «миллий ҳаракат куни»нинг бир қисми бўлди.

«Haaretz» газетаси ёзишича, ўнлаб исроиллик жамоат арбоблари иш ташлашни қўллаб-қувватлаб, унга қўшилган. Йирик касаба уюшмалари – адвокатлар, шифокорлар, бизнес форуми, шунингдек Қуддусдаги Иброний университети ҳам иштирокини тасдиқлади. Ресторан ва кафелар ҳам ёпилди.

Намойишчилар Ғазода гаровда қолаётган 50 кишидан фақат 20 нафари тирик деб ҳисобланаётганини, уруш давом этса уларнинг ҳаёти хавф остида қолишини айтган.

«Ҳарбий босим асирларни қайтармайди – уларни ўлдиради, холос. Уларни қайтаришнинг ягона йўли – барчасини бирданига, ўйинларсиз алмашиш борасида келишув қилишдир», деган аввал асирликда бўлган Исроил фуқароларидан бири.

Якшанба кунги намойишлар Исроил хавфсизлик кенгаши Ғазо шаҳрига ҳужум қилиш режаларини тасдиқлаганидан бир неча кун ўтиб бўлиб ўтмоқда. Икки йилдан бери давом этаётган уруш Ғазони вайронага айлантирди, аҳолининг катта қисмини очарчилик ёқасига олиб келди. Исроилнинг эса тобора халқаро майдонда яккаланиб қолишига сабаб бўлмоқда.

The Guardian нашрининг маҳаллий манбаларга таяниб ёзишича, намойишчилар Тел-Авивни Қуддус билан боғловчи магистрални тўсиб, шиналарни ёқиб юборган.

Исроил куч тузилмаларига кўра, 30 дан ортиқ намойишчи қўлга олинди.

Бош вазир Бенямин Нетаняҳу намойишчиларни танқид қилиб, уларнинг ҳаракатлари «ҲАМАСнинг позициясини янада қаттиқлаштиради, гаровдагиларнинг озод қилинишини чўзади ва 7 октябрь даҳшатлари яна такрорланишини кафолатлайди», деди.

Шунингдек, Исроилнинг ўта ўнг қанот сиёсатчилари ҳам намойишчиларни қоралаб, буни «Ҳамас фойдасига ишлайдиган бузуқ ва зарарли кампания» деб атаган.

Thousands of Israelis stayed home from work, flooded city streets and blocked roads and highways across the country on Sunday, staging some of the largest anti-war protests in months as the military prepares for a major assault on Gaza City. https://t.co/S4eBx4BWzE pic.twitter.com/OunIurUPEg

— The Washington Post (@washingtonpost) August 17, 2025

Исроилнинг АҚШдаги собиқ дипломати Алон Пинкас Нетаняҳунинг намойишларга жавобини кескин танқид қилди:

«Кўпчилик бош вазирлар 7 октябрдан кейин истеъфога чиққан бўларди. У оддий бош вазир эмас. У фақат ўзининг ҳокимиятда қолишига қизиқади. У Яқин Шарқни [харитасини] бошқатдан чизиш ҳақидаги хаёлларга берилган», деди у Al-Jazeera'га берган изоҳида.

Қарийб 2 йиллик уруш

Исроил шу вақтга қадар Ҳамас асир олган гаровдагиларнинг аксариятини дипломатик музокаралар орқали қайтарган. Июль ойида гаровдагиларни озод этиш имконини бериши мумкин бўлган яна бир сулҳ музокаралари барбод бўлди. ҲАМАС қолган асирларни фақат Исроил урушни тугатишга рози бўлса озод қилишини билдирди. Нетаняҳу эса ҲАМАС қуролсизланиши ҳамда бошқарувдан кетишини талаб қилмоқда.

Исроил ва ҲАМАС ўртасида 2023 йил октябрида бошланган уруш қарийб 2 йилдан буён давом этмоқда. Ғазо соғлиқни сақлаш вазирлигига кўра, Исроилнинг геноцид кўринишидаги уруши натижасида камида 61 минг фаластинлик ҳалок бўлган, уларнинг аксарияти тинч аҳоли. Бу рақам вайроналар остида қолиб кетган минглаб одамларни ўз ичига олмайди. Бундан ташқари, Ғазо сектори бутунлай вайрон бўлиб, 150 мингдан ортиқ инсонлар жароҳат олган. Айни вақтда Ғазода бошланган очарчилик оқибатида юзлаб инсонлар ҳалок бўлди.