ҲАМАС Ғазо бўйича сулҳни қабул қилди

Ҳамас Исроил билан 60 кунлик сулҳ таклифини қабул қилди. Унга кўра, Ғазода ушлаб турилган гаровдагиларнинг ярми озод қилинади ва Исроил айрим фаластинлик маҳбусларни қўйиб юборади. Бу ҳақда Миср расмий манбасига таяниб Reuters нашри хабар бермоқда.

Ҳамаснинг юқори лавозимли расмийси Басем Наим гуруҳнинг розилигини тасдиқлади. Ҳамас шунингдек, фаластинлик бошқа гуруҳлар ҳам воситачиларга ўз розиликларини билдирганини маълум қилди.

Исроил таклифга расмий жавоб бермаган, бироқ бир расмий унинг қабул қилинганини тасдиқлаган. Миср ва Қатар АҚШ қўллови билан томонлар ўртасида воситачилик қилмоқда.

Исроил бош вазир идораси тарқатган видеода Бенямин Нетаняҳу «Мен ҳам сиз каби оммавий ахборот воситаларидан хабарларни эшитяпман. Улардан келадиган асосий таассурот шуки, Ҳамас улкан босим остида», деган.

Reutersʼнинг мисрлик манбасига кўра, Ҳамас қабул қилган таклиф Исроилнинг ҳарбий ҳаракатларини 60 кунга тўхтатиш ва деярли икки йил давом этаётган урушни тугатишга оид кенгроқ келишув учун асос яратишни назарда тутади.

Бу таклиф АҚШ махсус элчиси Стив Уиткофф илгари тақдим этган ва Исроил қабул қилган режага жуда ўхшайди.

Маълум қилинишича, воситалар якшанба куни Қоҳирада Ҳамас вакиллари билан учрашди. Душанба куни Қатар бош вазири Абдураҳмон Ас-Сони ҳам музокараларга қўшилиб, Миср президенти ас-Сиси ва Ҳамас вакиллари билан учрашди.

Исроил босқинининг янги тўлқини

Исроил бу ой бошида Ғазо шаҳрини назоратга олиш режасини маъқуллаган эди. Расмийлар бу жараённи бошлаш ҳафталар талаб этиши мумкинлигини айтиб, сулҳга имкон қолдиришган. Бироқ Нетаняҳу унинг «жуда тез» бошланишини ва Ҳамаснинг мағлубияти билан якунланишини таъкидлаган.

Исроилнинг Ғазо шаҳрини тўлиқ назоратга олиш режаси чет элда ҳам, мамлакат ичкарисида ҳам хавотир уйғотди. Хусусан, 17 август куни юз минглаб исроилликлар уруш бошлангандан бери энг катта норозилик намойишларидан бирини ўтказиб, жангларни тугатиш ва гаровда сақланаётган 50 кишини озод қилиш бўйича келишув талаб қилди. Исроил расмийларига кўра, улардан 20 нафари тирик.

Исроилнинг кутилаётган ер усти ҳужуми сабабли минглаб фаластинликлар шарқий Ғазо шаҳридаги уйларини ташлаб, доимий бомбардимон остидаги ҳудудлардан ғарб ва жануб томон кетмоқда.

Гувоҳларнинг айтишича, душанба куни ўз кучининг намойиши сифатида Исроил танклари Ғазо шаҳрининг Сабра маҳалласига кириб борди. Ҳудудда камида 9 та танк ва бульдозер кўзга ташланган.Исроил армияси бош штаби раҳбари генерал-лейтенант Эял Замир мамлакат Ғазо урушида «бурилиш нуқтасида» турганини, асосий эътибор – Ҳамасга қарши зарбаларни кучайтиришга қаратилганини айтди.

Исроилнинг Ғазо шаҳрига танклар билан кириши, шундоқ ҳам ноинсоний шароитларда яшаётган юз минглаб одамларни кўчишга мажбур қилиши мумкин. Уларнинг кўпи уруш давомида бир неча бор уйидан қувилган.

Ғазо шаҳрида ҳам кўплаб фаластинликлар урушни тугатиш, Исроилнинг ҳужумини тўхтатиш ва Ҳамасни музокараларни кучайтиришга мажбур қилишга чақиришмоқда.

Сулҳ музокаралари

Исроил ва Ҳамас ўртасида сулҳ бўйича билвосита музокаралар охирги марта жорий июль охирида ўтказилган ва ўзаро айблашлар билан якунланган эди.

Исроил барча гаровдагилар озод қилинса ва Ҳамас қуролини ташласа, жангларни тўхтатишга рози бўлишини айтган. Аммо Ҳамас бу талабни Фаластин давлати тузилмагунча рад этиб келмоқда.

Ҳамас расмийси Reutersʼга душанба куни гуруҳ Исроилнинг «қуролсизланиш ёки раҳбарларни Ғазодан чиқариш» талабларини рад этганини айтди.

Исроилнинг Ғазодан қанчалик чиқиб кетиши ва гуманитар ёрдамнинг қандай етказилиши масаласида ҳам кескин тафовутлар мавжуд. Ёрдам ташкилотлари очарчилик хавфи ортаётганидан огоҳлантирмоқда.

2023 йил октябрь ойидан бери Исроилнинг ҳужумлари натижасида Ғазода қарийб 62 минг нафар фаластинлик ҳалок бўлди, уларнинг 20 мингдан ортиғи болалар. Ғазо соғлиқни сақлаш вазирлигига кўра, очлик ва тўйиб овқатланмаслик оқибатида сўнгги ойларда 200 дан ортиқ инсонлар ҳалок бўлган.