Путин: Россия СҲҚ-3 шартномасига яна бир йил амал қилишга тайёр

Россия президенти Владимир Путин Қўшма Штатларга 2026 йилнинг 5 февралида тугайдиган янги Стратегик ҳужумкор қуролларни қисқартириш бўйича шартнома (СҲҚ-3)га яна бир йил амал қилиш мажбуриятини олишини таклиф қилди. Вашингтон шундай чора кўрса, Россия шартнома қоидаларига яна бир йил амал қилишга тайёр, деди Путин 22 сентябр, душанба куни давлат телевидениеси орқали қисман кўрсатилган Россия Хавфсизлик кенгаши аъзолари билан учрашувда.

Путин, шунингдек, СҲҚ-3 шартномасининг амал қилиш муддати тугаши билан ядровий ракета салоҳиятини тўғридан тўғри чекловчи сўнгги халқаро келишув йўқолишини таъкидлади. «Ушбу келишув меросидан бутунлай воз кечиш кўп жиҳатдан нотўғри ва ўйланмай қўйилган қадам бўлади», деди у.

Россия президентининг сўзларига кўра, у «стратегик қуролланиш пойгасини қўзғатмаслик» ва «вазминлик даражасини таъминлаш» учун шартномада белгиланган статус-квони сақлаб қолишни мақсадга мувофиқ деб ҳисоблайди. «Ушбу чора Қўшма Штатлар шунга ўхшаш тарзда ҳаракат қилса ва мавжуд тўхтатувчи потенциал мувозанатини бузадиган қадамлар қўймасагина самарали бўлади», деди у.

«Биз миллий тийиб турувчи кучларимизнинг ишончлилиги ва самарадорлигига ишонамиз, бироқ айни пайтда кескинликни ва қуролланиш пойгасини кучайтиришдан манфаатдор эмасмиз», — дея қўшимча қилди Путин.