Etihad Airways Ўзбекистонга мунтазам парвозларни йўлга қўяди

Авиакомпания 2026 йил март ойидан бошлаб Абу-Дабидан Тошкентга мунтазам рейсларни йўлга қўйишни режалаштирмоқда. Бунинг учун рухсат олингани маълум бўлди.

Фото: Reuters

Фуқаро авиацияси агентлиги (Ўзавиация) БААнинг Etihad Airways авиакомпаниясига Ўзбекистонга мунтазам парвозларни амалга ошириш учун рухсатнома берди.

Авиаташувчи Абу-Даби-Тошкент-Абу-Даби йўналиши бўйича парвоз қилиш ҳуқуқини қўлга киритди. Парвозларда Airbus А320−232/251Н ва А321−231/251Н/251НХ самолётларидан фойдаланилади.

Июль ойида Etihad Евросиёнинг еттита шаҳрига ҳаво қатнови йўлга қўйилишини эълон қилганди. Компания Тошкентдан ташқари Қозоғистоннинг Олмаота, Грузиянинг Тбилиси, Арманистоннинг Ереван, Озарбойжоннинг Боку, Руминиянинг Бухарест ва Саудия Арабистонининг Мадина шаҳарларига парвозларни йўлга қўйишни режалаштирган.

Etihad Airways 2026 йил 17 мартдан бошлаб Абу-Даби-Тошкент рейсларини йўлга қўйиши айтилмоқда. Компания шаҳарлар ўртасида ҳафтасига олтита рейсни амалга оширади.

2022 йилнинг кузида Etihad’нинг шуъба авиаташувчиси — Air Arabia Abu Dhabi Ўзбекистон ва БАА пойтахтлари ўртасида мунтазам қатновлар йўлга қўйилишини эълон қилганди. Ўшанда ҳафтасига иккита рейс — чоршанба ва шанба кунлари амалга оширилиши режалаштирилган эди.

Air Arabia Abu Dhabi’га эгалик қилувчи Air Arabia лоукостери 2020 йилда Ўзавиациядан Ўзбекистонга парвозлар учун рухсат олган, шундан сўнг Абу-Даби-Тошкент рейсларини йўлга қўйди.

Эслатиб ўтамиз, Венгриянинг Wizz Air арзон авиакомпанияси 1 cентябрдан бошлаб Абу-Дабидан, жумладан Тошкентга барча парвозларини тўхтатишини эълон қилган. Компания веб-сайтида ушбу санадан кейинги чипталарни банд қилиш имконсиз.