Ҳамас гаровдаги тирик исроилликларнинг барчасини қайтарди (фотолар)

АҚШ воситачилигида тузилган сулҳ келишуви доирасида Ҳамас Ғазода сўнгги 20 нафар тирик гаровдагиларнинг барчасини Халқаро Қизил Хоч ташкилотига топширди.

Улар икки босқичда Исроил томонига топширилди — аввал Ғазодан дастлабки етти киши олиб чиқилди, кейинроқ яна 13 нафари. Топшириш жараёни Ғазо секторининг жанубида жойлашган Хон-Юнус шаҳрида амалга оширилди.

Гаровдагилар озод этилиши жума куни кучга кирган Исроил ва Ҳамас ўртасидаги келишувнинг муҳим босқичи бўлди. Ҳамас уларни озод этганидан сўнг 20 нафар гаровдаги фуқаро Исроил ҳудудига қайтди. Бунинг эвазига Исроил душанба куни кечга бориб қарийб 2 минг нафар фаластинлик маҳбусни озод этиши кутилмоқда.

Al-Jazeera'нинг ёзишича, Исроил нашрлари фаластинлик маҳбусларни ташиётгани тахмин қилинаётган икки автобус ва Қизил Хоч машиналарининг Офер қамоқхонасидан чиқиб кетаётганини кўрсатди.

АҚШ президенти Доналд Трамп аллақачон Яқин Шарққа келган ва Исроил парламентида нутқ сўзлаши кутилмоқда.

Трамп Исроил парламенти биносининг йўлагидан ўтаётган пайтда бир журналист ундан сўради: «Уруш расман тугадими?» «Ҳа, менимча, ҳа», - деб жавоб берди Трамп.

Аммо сулҳ битими урушни тўлиқ тугатмади. Энди Ғазода кейинги босқичда нима бўлиши ҳақида кўплаб саволлар очиқ қолмоқда — хусусан, Ҳамас Бинямин Нетаняҳунинг «қуролсизланиш» талабига рози бўладими ёки йўқми, номаълум. Ушбу масалалар бугун Мисрда ўтказилиши режалаштирилган Трамп ва бошқа жаҳон етакчилари иштирок этадиган саммитда муҳокама қилиниши кутилмоқда. Бироқ Исроил ҳам, Ҳамас ҳам унда қатнашмайди.

Исроилга келишда Доналд Трамп Ҳамасга Ғазо секторида олиб бораётган ички хавфсизлик амалиётлари учун «маълум муддатга рухсат берилгани»ни билдирди.

Жума куни кучга кирган сулҳдан кейин ҲАМАС Ғазо секторининг айрим ҳудудларига ички хавфсизлик кучларини жойлаштирди. Ҳамаснинг баёнотига кўра, бу чора тартибсизликлар, талон-торож ва хавфсизлик бўшлиғининг олдини олишга қаратилган.

«Air Force One» бортида бўлган журналистнинг саволига жавобан — яъни ҲАМАС ўзини «полиция кучи» сифатида тиклаётгани ҳақидаги хабарларга Трамп шундай деди:

«Улар муаммоларни тўхтатмоқчи, бу борада очиқ гапиришган ва биз уларга маълум муддатга рухсат бердик. Қарийб 2 миллион одам вайрон бўлган биноларга қайтяпти ва бу шароитда кўп ёмон нарсалар содир бўлиши мумкин. Шунинг учун биз хавфсизликни таъминлашни хоҳлаймиз. Менимча, ҳаммаси жойида бўлади. Лекин аниқ айтиш қийин», - деди Трамп.

Икки йил давом этган урушдан кейин, душанба куни бошланган сулҳ ва гаровдаги фуқаролар алмашинуви Исроил ҳамда Ғазода катта енгиллик олиб келди.

Исроилликлар учун гаровдагиларни қайтариш энг муҳим мақсад эди. Аввалги икки вақтинчалик сулҳ давомида ўнлаб гаровдагилар озод этилган, айримлари эса Исроил аскарлари томонидан тирик ҳолда қутқарилган эди.

Фаластинликлар учун эса сулҳ одатий ҳаётга қайтиш умидини берди. Минглаб кўчирилган ғазоликлар сулҳ кучга киргач, шимолга – Ғазо шаҳрига қайта бошлади. Исроил ҳам Ғазога зарур озиқ-овқат, дори-дармон ва бошқа инсонпарварлик ёрдами киришига рухсат берди. БМТга қарашли озиқ-овқат хавфсизлиги бўйича экспертлар айрим ҳудудлар расмий равишда очарчилик ҳолатида эканини билдирган.

АҚШ, араб ва турк воситачилиги остида ўтган ҳафта эришилган келишувга биноан, Исроил кучлари жума куни пешинга қадар Ғазонинг ичкарисидаги янги мудофаа чизиғига чекиниб, гаровдагиларни озод этиш учун 72 соатлик «дераза» очди.

Сулҳ шартларига кўра, Ҳамас эндиликда вафот этган гаровдагиларнинг жасадларини топшириши керак, аммо бу қанчалик тез амалга ошиши номаълум. Исроил 26 нафар гаровдаги фуқаронинг ҳалок бўлганини, яна икки нафарининг ҳолати номаълумлигини билдирган. Расмийлар Ҳамас айрим жасадларни қидириб топиши кераклигини, бу эса вақт олишини айтмоқда.

Гаровдагилари озод этилишидан бир неча соат олдин БМТ Ғазога инсонпарварлик ёрдами етказишда «сезиларли силжиш» кузатилаётганини маълум қилди.

Гаровдан қайтарилганлар яқинлари билан