Шаҳрисабз-Миробод кўчаси айланма чорраҳасидаги вазият бўйича изоҳ берилди

Тошкент шаҳар ҳокимлиги Шаҳрисабз-Миробод кўчаси айланма чорраҳасидаги вазият бўйича изоҳ тақдим этди.

Фото: Тошкент шаҳар ҳокимлиги

Шота Руставели кўчаси реконструкциясининг биринчи босқичи якунланиб, айланма қисмида ҳаракатланиш тизими янгилангандан сўнг, йўл белгилари ва кўрсаткичлари йўл ҳаракатини ташкил этиш қоидалари талабларига тўлиқ мувофиқ ҳолда ўрнатилган.

Айлананинг бутун периметри бўйлаб светофордан камида 50 метр олдин ҳайдовчиларга ҳаракат йўналишини олдиндан аниқлаш ва хавфсиз ҳаракатланиш имконини берувчи ахборот ва кўрсатма белгилари, шу жумладан, йўлаклар бўйича йўналиш кўрсаткичлари жойлаштирилган.

Чорраҳага яқинлашиш жойларида қатнов қисми устида металл конструкциялар ўрнатилган бўлиб, уларга барча ҳаракат кўрсаткичлари маҳкамланган. Бу зич транспорт оқимида ҳам уларни яхши кўриш имконини беради.

Баъзи ҳолларда ҳайдовчиларнинг янгиланган ҳаракат тизимига мослашиши билан боғлиқ ноқулайликлар вужудга келиши мумкин. Улар тезкорлик билан тегишли ташкилотлар ходимлари томонидан тезкор равишда бартараф этилади, дейилади ҳокимлик хабарида.

Тайёрлаган: Отабек Матназаров

#Тошкент #йўл белгилари #Шота Руставели кўчаси