Покистон билан тўғридан тўғри молиявий операциялар йўлга қўйилади

Ўзбекистон элчиси Алишер Тўхтаев Покистон савдо вазири ўринбосари Мари Кази билан учрашувда икки давлат ўртасида тўғридан тўғри молиявий операциялар тизимини шакллантириш, савдо айланмасини 2 млрд долларга етказиш ва логистикани оптималлаштириш бўйича амалий чораларни муҳокама қилди.

Фото: “Дунё” АА

“Дунё” АА маълумотига кўра, томонлар савдо-иқтисодий ҳамкорликни чуқурлаштириш, инвестиция ва саноат кооперациясини кенгайтириш, банк-молия муносабатларини такомиллаштириш, шунингдек транспорт ва логистика бўйича долзарб масалаларни атрофлича кўриб чиқди.

Учрашувда қуйидаги йўналишлар бўйича келишув ва таклифлар муҳокама қилинди:

тўғридан тўғри молиявий операцияларни амалга ошириш тизимини йўлга қўйиш;
ўзаро савдо айланмасини 2 млрд долларга етказиш вазифалари;
имтиёзли савдо тўғрисидаги битим доирасида маҳсулотлар рўйхатини кенгайтириш;
транспорт-логистика занжирини оптималлаштириш ва барқарор ишлашини таъминлаш;
фитосанитар ҳамкорлик самарадорлигини сақлаш, фармацевтика, электротехника ва саноат ускуналари бўйича мулоқотларни фаоллаштириш;
стандартлар ва сертификатлаш тизимларини ўзаро тан олиш, тўғридан тўғри етказиб беришни йўлга қўйиш ҳамда қўшма ишлаб чиқариш лойиҳаларини амалга ошириш;
ҳудудлараро ҳамкорликни кучайтириш ва “Ўзбекистон–Покистон ҳудудлараро форуми”ни ўтказиш;
минтақавий интеграция доирасида Трансафғон темирйўлини бунёд этиш масалаларига эътибор қаратиш.