Марказий Осиёнинг беш президенти илк марта Оқ уйда саммитга тўпланди. Минтақа лидерлари ўз нутқида президент Трампни мақтади. АҚШ президенти Марказий Осиёдан келган ҳамкасбларига минтақа – дунёнинг кучли ҳудудларидан бири деди. Вашингтондаги Халқаро солиқ ва инвестиция маркази президентига кўра, ушбу диалогда катта урғу Қозоғистон ва Ўзбекистонга берилаверади.
Марказий Осиё учун якунига етаётган ҳафтада содир бўлган энг муҳим воқеа бу шубҳасиз Вашингтондаги саммит бўлди. Аввало, айтиб ўтиш жоизки, буни минтақанинг беш давлати , бу мамлакатлардаги медиа саммит деб атамоқда. Бироқ, АҚШ президенти, унинг жамоаси, Оқ уй ҳамда Оқ уйнинг протокол раҳбари 6 ноябрь куни ўтказилган сиёсий тадбирни «кеча» дея номлади. Нима бўлса-да, АҚШ президенти қароргоҳи Оқ уйда биринчи марта Марказий Осиё президентлари С5+1 дипломатик регионал формати доирасида қабул қилинди.
Тадбир учун Оқ уйнинг залларидан бири танланган, Трамп нутқи билан кечани очиб бераркан, Марказий Осиёдан келган ҳамкасбларини дунёнинг кучли бурчагидан келганлар, деб атади. Бундан ташқари у администрацияси 8 та урушни тугатгани, қилган ижобий ишларни айтиб мақтанди.
“Афсуски, аввалги Америка президентлари бу минтақага бутунлай эътибор бермаган. Бу ақл бовар қилмайдиган минтақа ва айтганча, бу жуда бой минтақа ҳамдир. Аммо биз бу хатони тузатмоқдамиз ва мен Американинг ушбу мамлакатларнинг ҳар бири билан шериклигини ҳар қачонгидан ҳам мустаҳкамроқ қилишга қатъий бел боғлаганман”,- дейди Трамп.
Бирма-бир сўзга чиққан беш республика президентлари у қадар узоқ нутқ сўзламади. Энг кўп Қозоғистон президенти, 4 дақиқалар гапирди. Тўқаев, Трампни буюк лидер деб атаб, сизнинг даврингизда Америка олтин асрини яшаяпти, деди.
“Менинг қатъий ишончим комилки, жаноб президент, Сиз барчамиз баҳам кўрадиган ва қадрлайдиган соғлом ақл ва анъаналарни Америка Қўшма Штатларининг ички ва ташқи сиёсатига қайтариш учун Яратган томонидан юборилган буюк етакчи, давлат арбобисиз”, деди Тўқаев.
Шавкат Мирзиёев эса Трампни тинчлик президенти деб атади. Шу ўринда айтиб ўтиш керак, кўп медиалар Ўзбекистон раҳбари Трампни дунё президенти, деди дея хабар тарқатмоқда. Бироқ аслида таржима хато кетган бўлиши мумкин. Чунки, рус тилида чиқиш қилган Мирзиёев ҳамкасбини президент мира, яъни – тинчлик президенти демоқчи бўлди. Россия – Украина урушини ҳам ўзингиз тугатишингиз керак, дея қўшимча қилди Мирзиёев.
