Божхоначилар қарийб 1 трлн сўмлик ноқонуний товар айланмасини тўхтатди

Божхона қўмитасида 2025 йилнинг 10 ойи давомида божхона органлари томонидан амалга оширилган чора-тадбирлар юзасидан брифинг бўлиб ўтди.

Маълум қилинишича, жорий йилнинг январь–август ойларида чегара-божхона постлари орқали 1,5 млн га яқин юк автотранспорт воситалари (+25 фоиз), 670 мингдан зиёд юкли вагонлар (+14 фоиз), шунингдек, 50,5 млн нафар йўловчи (+10 фоиз) ҳаракатланган.

Ҳисобот даврида 946 мингдан зиёд (+12 фоиз) божхона юк декларациялари расмийлаштирилган.

Тадбиркорларнинг молиявий барқарорлигини қўллаб-қувватлаш мақсадида 12 мингдан ортиқ ташқи иқтисодий фаолият қатнашчисига 47 трлн сўм божхона тўловларидан имтиёз ва преференциялар қўлланилган. Шунингдек, 400 дан зиёд тадбиркорлик субъектига 4,8 трлн сўм божхона тўловларини кечиктириб тўлашга рухсат берилган.

Давлат бюджетига жами 60,7 трлн сўм божхона тўловлари ўтказилиб, кўзланган режа 101,3 фоизга бажарилгани қайд этилди.

Маълумотга кўра, яширин иқтисодиётга қарши курашиш борасида 34,6 минг ҳолатда салкам 1 трлн сўмлик товарлар, жумладан:

73,3 млрд сўм эквивалентидаги валюта қимматликлари;
114,1 млрд сўмлик заргарлик буюмлари ноқонуний айланмасига чек қўйилган.

Мамлакат аҳолисининг соғлиги ва хавфсизлигини таъминлаш доирасида олиб борилган чора-тадбирлар натижасида:

1 тонна 610 кг гиёҳвандлик воситалари;
1 тонна 55 кгдан зиёд психотроп ва кучли таъсир этувчи моддалар;
137 та ўқотар ва совуқ қуроллар;
566 та патронлар;
44,5 млрд сўмлик тамаки маҳсулотлари божхоначилар томонидан ушлаб қолинган.

Соҳани рақамлаштириш ҳисобига экспортда 94 фоиз, импортда 85 фоиз божхона юк декларациялари соддалаштирилган тартибда расмийлаштирилган. Бунда БЮДни инсон омилисиз расмийлаштириш ҳажми экспортда 45 фоиз, импортда эса 6 фоизни ташкил этган.

Божхона ҳудудида қайта ишлаш режимини оммалаштириш натижасида ушбу режимдан фойдаланган тадбиркорлар сони 443 нафарни ташкил этди. Мазкур режимга 979 млн долларлик товарлар жойлаштирилиб, қайта ишланган қарийб 1,2 млрд долларлик товарлар (+43 фоиз) экспорт қилингани маълум қилинди.